मराठी मनोरंजन विश्वातील ज्येष्ठ अभिनेत्री ज्योती चांदेकर-पंडीत यांनी काही दिवसांपूर्वी जगाचा निरोप घेतला.  अल्पशा आजारानं 69व्या वर्षी पुण्यातील खाजगी रुग्णालयात त्यांनी अखेरचा श्वास घेतला. ज्योती चांदेकर-पंडीत यांची आणखी एक ओळख सांगायची झाली तर, मराठी अभिनेत्री तेजस्विनी पंडीतची आई. आईच्या जाण्यानं तेजस्विनी आणि तिची बहीण पौर्णिमाच्या आयुष्यात मोठी पोकळी निर्माण झाली आहे. ज्योती चांदेकर जाताना फक्त त्यांच्या कुटुंबालाच पोरकं करुन गेल्या नाहीत, तर त्यांच्या प्रेक्षकांनाही अतीव दुःख देऊन गेल्या आहेत. त्यांच्या निधनानंतर चाहत्यांकडून पोस्ट, कमेंट करत श्रद्धांजली वाहत आहेत. ज्योती चांदेकर यांनी 'ठरलं तर मग' मालिकेत साकारलेली पूर्णा आज्जीची भूमिका प्रेक्षकांना खूप भावली. आता प्रेक्षकांकडून पूर्णा आज्जींच्या पात्राबाबत कमेंट केल्या जात आहेत. 

निधन होण्याच्या अगदी काही दिवस आधीच ज्योती चांदेकर यांनी 'ठरलं तर मग'  मालिकेच्या महासंगम स्पेशल भागाचे शूटिंग पूर्ण केलं होतं. त्यानंतर 10 ऑगस्टला त्या पुण्याला गेल्या आणि 16 ऑगस्टला त्यांचं निधन झाल्याचं वृत्त आलं. त्यामुळे त्यांच्या सहकलाकारांना आणि प्रेक्षकांनाही मोठा धक्का बसला आहे. ज्योती चांदेकर यांच्या निधनानंतर आता 'ठरलं तर मग'मध्ये पूर्णा आज्जीची भूमिका कोण साकारणार? यावर सोशल मीडियावर प्रेक्षकांकडून काही अभिनेत्रींची नावं सुचवण्यात आलेली. अशातच आता अभिनेत्रीचे चाहते भावनिक पोस्ट करुन मालिकेत त्यांची जागा इतर कोणत्याही अभिनेत्रीला देऊ नका, अशी मागणी करत आहेत.

प्रेक्षकांचं पूर्णा आज्जी पात्रावरचं प्रेम आणि आईच्या निधनानंतर त्यांनी केलेल्या भावूक कमेंटवर ज्योती चांदेकरांची लेक पौर्णिमा पंडीत व्यक्त झाली आहे. यासंदर्भात तिनं सोशल मीडियावर एक पोस्ट केली आहे. ज्योती चांदेकरांचा पूर्णा आज्जीचं पात्र साकारतानाचा फोटो आणि प्रेक्षकांच्या प्रतिक्रियांचे स्क्रिनशॉट शेअर करत पोर्णिमानं ही पोस्ट लिहिली आहे.

ज्योती चांदेकर-पंडीत यांची लेक पौर्णिमा पंडीत सोशल मिडिया पोस्टमध्ये म्हणाली की, "मी, प्रेक्षक आणि ज्योती चांदेकर-पंडित (आई). मला कळायला लागलं त्या वयापासून आपली आई बाकीच्या मित्र-मैत्रिणींच्या आयांपेक्षा वेगळी आहे हे हळूहळू कळू लागलं होतं. आई मला आणि तेजूला कधीच पुरायची नाही, तिचा हवा तेवढा सहवास मिळायचा नाही म्हणून मी आईच्या नाटकांना जायचे. विंगेमधून प्रेक्षक किती आलेत हे छोट्याशा फटीतून लपून बघायचे आणि नेहमी ती गर्दी बघून मला आश्चर्य वाटायचं, की माझ्या आईला बघायला एवढे लोक येतात. वर्दीवाले आणि नाटक-सिनेमामध्ये काम करणारे घरी कधी येतील ह्याचा पत्ताच नसतो असं माझी आज्जी म्हणायची. तेव्हा आपली आई ह्या प्रेक्षकांना छान वाटावं म्हणून तिची कला सादर करत कायम दौऱ्यांवर असते आणि आपल्यापासून लांब असते हे डोक्यात बसलं होतं. माझ्याही पेक्षा जास्त प्रेक्षकांचं आईवर जास्त प्रेम आहे हे मला एक मुलगी म्हणून कधीच पटलं नाही."

"पण आई आता गेली, अशी अचानक आम्हाला सोडून गेली आणि माझा हा विचार अलगद पुसून गेली. पूर्वी नाटक, नंतर सिनेमा आणि आता वयाच्या ह्या टप्प्यात मालिकांमधला प्रेक्षक आणि प्रेम करणारा वर्ग हा वर्षानुवर्षे वाढतच गेला. माझ्या आणि तेजूच्या जवळच्या माणसांनी, कुटुंबाने आम्हाला खूप साथ दिलीच पण तिच्यावर भरभरून प्रेम करणाऱ्या प्रेक्षकांनी जो प्रेमाचा वर्षाव केलाय तो शब्दात मांडणं कठीण.", असं पौर्णिमा पंडीत म्हणाली. 

"ठरलं तर मग' मालिकेत ज्योती यांनी साकारलेल्या 'पूर्णा आजी'च्या पात्राच्या जागी इतर कोणाला घेऊ नका अशी मागणी अजूनही प्रेक्षकांकडून होते आहे. याविषयी पोर्णिमाने लिहिले की, 'अजूनही सोशल मीडियावर पूर्णा आजीला रिप्लेस करू नका, तिची जागा कुणीच घेऊ शकत नाही, पूर्णा आजी गावाला गेली आहे असं दाखवा हीच खरी श्रद्धांजली, असा कलाकार होणे नाही... अशा अगणित कमेंट्स पाहून आपल्या आईने काय कमावून ठेवलं, किती प्रेक्षक जोडले आहेत याची प्रचिती आली. आता पटतंय, कलाकार हा आधी प्रेक्षकांचा असतो, मग घरच्यांचा असतो. माझी आई म्हणजे ज्योती चांदेकर-पंडित, एक रंगकर्मी, कलाकार. अनेक संकटांमधून वाट काढत ती तिचं आयुष्य थाटात जगली, रुबाबात राहिली, माणसं जोडली, नाती बनवली, प्रेम वाटलं आणि प्रेम मिळवलं. या दुःखात आमच्यासोबत उभ्या राहिलेल्या, आमचा आधार झालेल्या सर्व कुटुंबियांचे, मित्र परिवाराचे आणि प्रेक्षकांचे मनापासून आभार.", असं पौर्णिमा पंडीत म्हणाली.