सातारा : महाराष्ट्रामध्ये गेल्या पंचवीस वर्षापासून शिक्षकांचे खच्चीकरण करणारी शिक्षणसेवक कालावधी पद्धत अत्यंत अडचणीची आहे. या पदाचा कालावधी तीन वर्षावरून एक वर्ष कमी करावा, अशी मागणी पवित्र पोर्टल शिक्षक कृती समितीचे समन्वयक संतोष मगर, दीपक तांबारे, सचिन व्हायाळ, संतोष गायकवाड आणि शिक्षक सेना महाराष्ट्र राज्य जिल्हाप्रमुख अमोल ढगे यांनी केली आहे.

शिक्षक कृती समितीच्या समन्वयकांनी शनिवारी पत्रकार परिषदेत पत्रकारांशी संवाद साधत शिक्षण सेवक पदाच्या अडचणी आणि त्या मागच्या तांत्रिक बाजू स्पष्टपणे मांडल्या. संतोष मगर म्हणाले, शिक्षण सेवक पद जर रद्द करता येत नसेल तर त्याचा कालावधी एक वर्षाचा करावा. 2024 मध्ये झालेल्या शिक्षण सेवक भरती शिक्षकांचे वय सरासरी 35 आहे. त्यांना निवृत्तीपर्यंत कमाल सेवा कालावधी 23 वर्षाचा मिळतो. तीन वर्ष शिक्षण सेवकाचा कालावधी आणि त्या काळातील अल्प वेतन अन्यायकारक आहे. शिक्षण सेवक कालावधीत शिक्षकांचे तीन वेतन वाढीचे नुकसान होते. त्याचा नकारात्मक परिणाम शिक्षकाच्या संपूर्ण सेवा कालावधीवर होतो.