सातारा : जागतिक महिला दिनाच्यानिमित्ताने जिल्हा परिषदेच्या ग्रामपंचायत आणि पाणी व स्वच्छता विभागाच्या वतीने जिल्ह्यातील 1 हजार 492 ग्रामपंचायतीत विशेष महिला ग्रामसभा आणि महिला सभा पार पडली. यामध्ये आरोग्यासह अन्य विषयांवरही चर्चा करण्यात आली. तसेच पाणी आणि स्वच्छतेत काम करणार्‍या महिलांचा सन्मानही करण्यात आला.

जिल्ह्यातील सर्व ग्रामपंचायतीत जागतिक महिला दिन साजरा करण्यात आला. या दिनाचे औचित्य साधून जिल्हा परिषदेच्या ग्रामपंचायत विभागाने महिला ग्रामसभा तर पाणी व स्वच्छता विभागाकडून महिला सभेचे आयोजन करण्यात आले होते. महिला सभेंतर्गत सातारा तालुक्यातील कोंडवे येथे वॉश रन चे आयोजन करण्यात आले होते. यावेळी पाणी व स्वच्छता विभागाच्या उपमुख्य कार्यकारी अधिकारी प्रज्ञा माने-भोसले, सरपंच आयुब शेख, विस्तार अधिकारी दळवी, जिल्हा तज्ज्ञ रवींद्र सोनावणे, अजय राऊत, राजेश भोसले, गणेश चव्हाण, ऋषिकेश शिलवंत, हेमा बडदे, ग्रामपंचायत अधिकारी लोहार, मुख्याध्यापक शिंगटे यांच्यासह शिक्षक, विद्यार्थी उपस्थित होते.