सातारा  :  सातारा नगरपरिषदेच्या नुकत्याच झालेल्या निवडणुकीत अपक्ष निवडून आलेले श्री.सागर पावशे यांनी खासदार उदयनराजे भोसले यांची पुणे येथील निवासस्थानी सदिच्छा भेट घेतली. या प्रसंगी पावशे यांच्या पालिका निवडणूकीतील मोठ्या यशाबद्दल हार्दिक अभिनंदन करण्यात आले तसेच जनतेने दिलेल्या विश्वासाला न्याय देत शहराच्या विकासासाठी ते निष्ठेने व प्रभावीपणे कार्य करतील, अशा शुभेच्छा उदयनराजे यांनी दिल्या.

सातारा शहराच्या प्रगतीसाठी सर्वांनी एकत्र येऊन सकारात्मक आणि लोकाभिमुख काम करण्याचा निर्धार यावेळी व्यक्त झाला. उदयनराजे यांनी सागर पावशे यांचे पेढा भरवून तोंड गोड केले. याप्रसंगी सातारा लोकसभा संयोजक श्री.सुनील काटकर, प्रतापगड प्राधिकरण समितीचे सदस्य श्री.काका धुमाळ, माजी उपनगराध्यक्ष श्री.रवी पवार, माजी नगरसेवक श्री.कल्याण राक्षे, श्री.विश्रांत कदम, श्री.अंकुश जाधव, श्री.राजेंद्र शेडगे व श्री.संदीप शेडगे उपस्थित होते.