सातारा : पाचगणी, ता. महाबळेश्वर (जि. सातारा) येथील प्लॉट क्रमांक २२३ वरील ‘बरुचा बंगला’मधील दोन-तृतीयांश अविभाजित हिस्सा अंमलबजावणी संचालनालयाने ताब्यात घेतला आहे. मनी लॉन्डरिंग प्रतिबंधक कायदा, २००२ अंतर्गत ही मोठी कारवाई करण्यात आली असून परिसरात मोठी खळबळ उडाली आहे.

अंमलबजावणी संचालनालय, मुंबई विभागीय कार्यालयाने नोंद क्रमांक एमबीझेडओ-१७/०८/२०१९ अंतर्गत तपास करत ही कारवाई केली. उपसंचालक अमिताभ मिश्रा यांनी कलम ८ च्या उपकलम (४) अन्वये संबंधित मालमत्तेचा ताबा घेतल्याचे अधिकृत निवेदनात नमूद करण्यात आले आहे. सदर मालमत्तेबाबत २० ऑक्टोबर २०२० रोजी कलम ५ च्या उपकलम (१) अंतर्गत तात्पुरता जप्ती आदेश क्रमांक १३/२०२० जारी करण्यात आला होता. त्यानंतर नवी दिल्ली येथील निर्णायक प्राधिकरणाने १५ एप्रिल २०२१ रोजी मूळ तक्रार क्रमांक १३७२/२०२० मध्ये त्या जप्ती आदेशाला पुष्टी दिली.

जप्त करण्यात आलेल्या मालमत्तेमध्ये बंगल्याशी संबंधित सर्व हक्क, जमिनीतील हिस्सा, प्रवेशमार्ग, सामायिक क्षेत्रे, सुविधा, उपकरणे आणि संलग्न सुधारणा यांचा समावेश आहे. सातारा जिल्ह्यातील शहर सर्वेक्षण व मालमत्ता अभिलेखात नोंद असलेली ही मालमत्ता पुढील आदेश येईपर्यंत शासनाच्या ताब्यात राहणार आहे.

संबंधित प्रकरणात जुनैद इक्बाल मेमन यांच्या नावाशी संबंधित कागदपत्रांच्या आधारे ही कारवाई करण्यात आली आहे. आर्थिक गैरव्यवहार आणि संशयित निधीच्या व्यवहारांची चौकशी सुरू असून तपास यंत्रणा पुढील कायदेशीर कार्यवाही करीत आहे. कलम ८ च्या उपकलम (४) नुसार ताबा घेतल्यानंतर संबंधित मालमत्तेवर कोणतीही विक्री, हस्तांतरण किंवा नवीन हक्क निर्माण करण्यास मनाई करण्यात आली आहे. न्यायालयीन आदेशाशिवाय कोणालाही त्या मालमत्तेवर दावेदारी करता येणार नाही.