सातारा : सातारा शहरासह तालुक्यातून वेगवेगळ्या घटनेत तीन जण बेपत्ता झाल्याच्या तक्रारींची नोंद संबंधित पोलीस ठाण्यांमध्ये करण्यात आली आहे.

याबाबत पोलिसांनी दिलेली माहिती अशी, तामजाईनगर मधील भैरवनाथ कॉलनी येथून सागर मारुती सावंत (वय ४०) हे बेपत्ता झाले आहेत. दि. ३० एप्रिल ते दि. २ मे या दरम्यान ते फ्लॅट भाड्याने मिळतो आहे, तो पाहून येतो, असे सांगून गेले आहेत. शाहूपुरी पोलीस ठाण्यात पत्नी तेजस्विनी सागर सावंत (वय ३७, रा. भैरवनाथ कॉलनी, तामजाईनगर) यांनी फिर्याद दिली आहे. पोलीस हवालदार डमकले तपास करत आहेत.

दुसऱ्या घटनेत गोडोलीतील जोशीवाडा येथून संदीप अशोक साळुंखे (वय ४०)हे दि. २९ एप्रिल रोजी कोणासही काहीही न सांगता निघून गेले आहेत. याबाबत आई रंजना अशोक साळुंखे (वय ६०) यांनी सातारा शहर पोलीस ठाण्यात फिर्याद दिली आहे. पोलीस हवालदार पोळ तपास करत आहेत.

तिसऱ्या घटनेत कमनूर नरेश भोसले (वय २७, रा. देगाव, ता. सातारा) हा दि. २ रोजी सकाळी ७ वाजता निगडी वंदन, ता. सातारा येथून बेपत्ता झाला आहे. या प्रकरणी चिनोर नरेश भोसले (रा. देगाव) याने सातारा तालुका पोलीस ठाण्यात फिर्याद दिली आहे. पोलीस हवालदार राऊत तपास करत आहेत.