सातारा : सातारा जिल्हा मध्यवर्ती सहकारी बँकेच्या निवडणुकीत शशिकांत जयवंतराव शिंदे यांनी दोन मतदारसंघांतून उमेदवारी अर्ज दाखल केल्याने निवडणुकीच्या राजकारणाला नवे वळण मिळाले आहे. जावळी प्राथमिक कृषी पतसंस्था मतदारसंघासह औद्योगिक, विणकर, मजूर व पाणीपुरवठा संस्था मतदारसंघातून त्यांनी अर्ज दाखल केला आहे. त्यामुळे शशिकांत शिंदे नेमकी कोणती जागा कायम ठेवणार, यापेक्षा त्यांच्या उमेदवारीमागील राजकीय गणित काय, याची चर्चा जिल्हा बँकेच्या वर्तुळात सुरू झाली आहे.
जावळीच्या सोसायटी मतदारसंघात ज्ञानदेव किसन रांजणे, विठ्ठल गुलाबराव गोळे आणि शशिकांत शिंदे अशी नावे सध्या रिंगणात आहेत. शिंदे यांनी जावळीतील अर्ज कायम ठेवला तर रांजणे यांच्यासमोर थेट राजकीय आव्हान उभे राहू शकते. विशेष म्हणजे शशिकांत शिंदे यांचे वास्तव्य लासुरणे, कोरेगाव येथे असतानाही जावळी मतदारसंघातून त्यांनी अर्ज दाखल केल्याने या उमेदवारीकडे वेगळ्या राजकीय नजरेने पाहिले जात आहे.
दुसरीकडे औद्योगिक, विणकर, मजूर व पाणीपुरवठा संस्था मतदारसंघात तब्बल १५ उमेदवार आहेत. मुकुंदराव देसाई, शेखर गोरे, वंदना देसाई, अनिल देसाई यांच्यासह अन्य दिग्गज या मतदारसंघात आहेत. त्यामुळे येथे उमेदवारी कायम ठेवणे म्हणजे जिल्हास्तरीय राजकीय स्पर्धेत थेट उतरण्याचा निर्णय ठरणार आहे.
शशिकांत शिंदे यांचा कोणता अर्ज कायम राहतो, यावर जावळीतील आणि औद्योगिक-मजूर मतदारसंघातील समीकरणे बदलण्याची शक्यता आहे. विशेषतः विठ्ठल गोळे यांच्या भूमिकेकडेही लक्ष लागले आहे. शिंदे यांनी जावळीतून माघार घेतल्यास आणि गोळे यांनीही अर्ज मागे घेतला, तर रांजणे यांच्या उमेदवारीचा मार्ग तुलनेने सुकर होऊ शकतो. मात्र दोघांपैकी कोणी रिंगणात राहिले, तरी जावळीतील लढतीचे गणित कायम राहणार आहे.
दरम्यान, ५ ऑक्टोबरला छाननी, ६ ऑक्टोबरला वैध उमेदवारांची यादी, २१ ऑक्टोबरला माघारीची अंतिम मुदत आणि २२ ऑक्टोबरला अंतिम उमेदवारांची यादी जाहीर होणार आहे. त्यामुळे माघारीपूर्वी होणाऱ्या राजकीय चर्चा, संभाव्य समझोते आणि उमेदवारांच्या हालचालींना महत्त्व आले आहे.
१ नोव्हेंबरला मतदान आणि ३ नोव्हेंबरला मतमोजणी होणार असली, तरी शशिकांत शिंदे यांच्या दोन अर्जांमुळे निर्माण झालेला पेच २१ ऑक्टोबरलाच सुटणार आहे. त्यांची एक सही जावळीचे समीकरण बदलणार की जिल्हास्तरीय औद्योगिक-मजूर मतदारसंघातील लढत अधिक चर्चेत आणणार, याकडे आता लक्ष लागले आहे.

एक अर्ज’ कोणता? निर्णयामागे कोणते गणित?
शशिकांत शिंदे यांच्यासमोर केवळ एका अर्जाची माघार घेण्याचा प्रश्न नाही, तर दोन वेगवेगळ्या राजकीय क्षेत्रांपैकी कोणत्या ठिकाणी आपली ताकद वापरायची, हा मुद्दा आहे. जावळीतील अर्ज कायम ठेवल्यास स्थानिक सहकारातील थेट लढतीला सामोरे जावे लागेल; तर औद्योगिक-मजूर मतदारसंघ कायम ठेवल्यास जिल्हास्तरीय स्पर्धेत स्थान निश्चित करण्याची संधी असेल. त्यामुळे २१ ऑक्टोबरपूर्वी शिंदे कोणता पर्याय स्वीकारतात, यावर जिल्हा बँकेतील पुढील राजकीय समीकरणांचा एक महत्त्वाचा धागा स्पष्ट होणार आहे.