मुंबई : सर्वात महत्त्वाची आरोग्य सुविधा 'आपली चिकीत्सा' पुन्हा एकदा बंद करण्यात आली आहे. बीएमसी दवाखाने आणि रुग्णालयांमधील चाचणी सुविधा बंद केल्याने मुंबईतील लोकांना धक्का बसला आहे. ही सुविधा 'आपला दवाखान्यात' मोफत आणि उपनगरीय रुग्णालयांमध्ये परवडणाऱ्या दरात दिली जाते. मात्र आता १५ दिवसांत दुसऱ्यांदा 'आपली चिकीत्सा' थांबवण्यात आली आहे. 

३ डिसेंबर रोजी ही सेवा तात्पुरती बंद करण्यात आली होती. ही बातमी प्रसिद्ध झाल्यानंतर बीएमसीने कृष्णा डायग्नोस्टिकला ही सेवा सुरू ठेवण्याची विनंती केली होती. कृष्णा डायग्नोस्टिकने १५ तारखेपर्यंत सेवा सुरू ठेवली, मात्र सोमवारपासून सेवा देण्यास नकार दिला.

कृष्णा डायग्नोस्टिकच्या सीईओ पल्लवी जैन यांनी सांगितलं की, आम्ही बीएमसीच्या सर्व केंद्रांमध्ये चाचणी सुविधा बंद करण्याचा निर्णय घेतला आहे. आम्हाला २७.५२ कोटी रुपयांच्या चाचण्या करायच्या होत्या, ज्या आम्ही नोव्हेंबर २०२४ मध्ये पूर्ण केल्या. आम्ही संबंधित बीएमसी अधिकाऱ्यांना जुलैमध्येच याबाबत सातत्याने माहिती दिली होती, मात्र त्यांनी आम्हाला सेवा सुरू ठेवण्याची विनंती केली होती.

रुग्णांची गैरसोय होऊ नये म्हणून आम्ही शेवटची तारीख १५ डिसेंबरपर्यंत वाढवली होती. सध्या बीएमसीकडे आमची ८ कोटी रुपये थकबाकी आहे. या प्रकरणी अतिरिक्त महापालिका आयुक्त बिपीन शर्मा यांच्याशी चर्चा केली असता त्यांनी उपायुक्त संजय कुऱ्हाडे यांच्याशी संपर्क साधण्यास सांगितलं. याबाबत डीएमसीशी संपर्क साधण्याचा प्रयत्न करण्यात आला, मात्र अद्याप त्यांची प्रतिक्रिया आलेली नाही.

'आपली चिकित्सा' योजनेअंतर्गत १३७ प्रकारच्या बेसिक आणि अॅडव्हान्स पॅथोलॉजी टेस्ट केल्या जातात. कृष्णा डायग्नोस्टिकद्वारे BMC दवाखाने, प्रसूतिगृहं, उपनगरीय रुग्णालयं, विशेष रुग्णालयं आणि वैद्यकीय महाविद्यालयांसह ४०० हून अधिक केंद्रांवर वैद्यकीय सेवा पुरवते. त्यांच्याकडे दररोज सरासरी ४ हजार रुग्णांचे नमुने तपासणीसाठी येतात. ज्यामध्ये ते ३५ ते ४० हजार वेगवेगळ्या प्रकारच्या चाचण्या करतात.