गोवा : काही महिन्यांपूर्वीच, आपण पाहिले की आयएनएस विक्रांत या नावाने पाकिस्तानची झोप उडवली होती. आयएनएस  विक्रांत अद्वितीय आहे. आजचा दिवस अद्भुत आहे. हा क्षण संस्मरणीय आहे. आज माझ्या एका बाजूला विशाल समुद्र आहे आणि दुसऱ्या बाजूला भारतमातेच्या शूर सैनिकांची अफाट ताकद आहे. आयएनएस विक्रांतवर काल रात्री वेळ खूप चांगला गेला. तो अनुभव शब्दात वर्णन करणे कठीण आहे. मी पाहिले की तुम्ही उत्साह आणि आनंदाने भरलेले होतात. तुम्ही गाणी गायलीत. तुम्ही तुमच्या गाण्यांमध्ये ऑपरेशन सिंदूरचे ज्या प्रकारे वर्णन केलेत, ते खूपच अद्भूत  होते. युद्धभूमीवर उभा असलेला सैनिक ज्या भावना व्यक्त करू शकतो, तशा भावना इतर कोणीही व्यक्त करू शकणार नाही, असे  पंतप्रधान नरेंद्र मोदी म्हणाले.

नरेंद्र मोदी म्हणाले, "दिवाळीच्या सणात प्रत्येकाला आपल्या कुटुंबासोबत दिवाळी साजरी करावीशी वाटते. मलाही माझ्या कुटुंबातील सदस्यांसोबत दिवाळी साजरी करण्याची सवय झाली आहे. म्हणूनच मी तुमच्यासोबत, म्हणजेच जे माझे कुटुंबातील सदस्य आहेत, त्यांच्यासोबत दिवाळी साजरी करायला आलो आहे. मीही ही दिवाळी माझ्या कुटुंबातील सदस्यांसोबत साजरी करत आहे," असे ते म्हणाले.

"मला आठवते, जेव्हा आयएनएस विक्रांत देशाला सोपवण्यात येत होती, तेव्हा मी म्हटले होते की विक्रांत प्रचंड, विशाल, भव्य, विहंगम आहे. विक्रांत अद्वितीय आहे, विक्रांत विशेष आहे. विक्रांत ही केवळ एक युद्धनौका नाही, तर ते २१ व्या शतकातील भारताच्या कठोर परिश्रम, प्रतिभा, प्रभाव आणि वचनबद्धतेचे प्रमाण आहे

भारतासह जगाच्या विविध ठिकाणी सध्या दिवाळी मोठ्या उत्साहाने साजरी केली जात आहे. भारतातही दिवाळी मोठ्या जल्लोषात साजरी केली जात आहे.  नरेंद्र मोदी यांनी गोवा आणि कारवारच्या किनाऱ्यावर आयएनएस विक्रांतवरील शूर सशस्त्र दलाच्या जवानांसोबत दिवाळी साजरी केली. यावेळी त्यांनी जवानांना दिवाळीच्या शुभेच्छा दिल्या आणि त्यांच्या शौर्याचे कौतुक केले. "काही महिन्यांपूर्वीच, आपण पाहिले की विक्रांत या नावाने पाकिस्तानची झोप उडवली होती. त्याचे सामर्थ्य इतके आहे की युद्ध सुरू होण्यापूर्वीच शत्रूचे मनोबल कमी होते. ही आयएनएस विक्रांतची शक्ती आहे... या प्रसंगी, मी आपल्या सशस्त्र दलांना विशेष सलाम करू इच्छितो, असे  नरेंद्र मोदी म्हणाले.