सातारा : पुसेगाव, ता. खटाव येथे बंद घराचे कुलूप तोडून अज्ञाताने 7 लाख 21 हजार रुपये किमतीचा मुद्देमाल हातोहात लांबवल्याची घटना घडली आहे. यामध्ये सोन्याचे दागिने आणि रोख रकमेचा समावेश असून या घटनेमुळे खळबळ निर्माण झाली आहे. या चोरीची फिर्याद राजाराम नामदेव वसव वय 66 रा. भवानीनगर, पुसेगाव यांनी पुसेगाव पोलीस ठाण्यात दिली आहे.

प्राप्त फिर्यादीनुसार, फिर्यादी वसव हे सेवानिवृत्त सरकारी कर्मचारी असून काही कामानिमित्त ते मंगळवारी कौटुंबिक कार्यक्रमानिमित्त महाबळेश्वरला गेले होते. त्यामुळे त्यांचे शिक्षक कॉलनी भवानीनगर येथील घर बंद होते. त्याचा फायदा घेऊन अज्ञात चोरट्याने घराचा कडी कोयंडा उचकटून आत प्रवेश केला. ही चोरी मंगळवारी सायंकाळी पावणे सात ते बुधवारी सकाळी पावणेसात या दरम्यान झाल्याचा पोलिसांचा अंदाज आहे. चोरट्यांनी कपाटाचे लॉक तोडून त्यामधील एक लाख वीस हजार रुपये किंमतीच्या चार सोन्याच्या बांगड्या, चाळीस हजार रुपये किंमतीची एक सोन्याची चैन, एक लाख रुपये किंमतीचा सोन्याचा नेकलेस, चाळीस हजार रुपये किंमतीचे कानातील सोन्याचे झुबे, वीस हजार रुपये किंमतीची हातातील सोन्याची एक अंगठी, 80 हजार रुपये किंमतीचा एक सोन्याचा नेकलेस, 80 हजार रुपये किंमतीचा सोन्याचा राणीहार, एक लाख 40 हजार रुपये किंमतीचे सोन्याचे गंठण व 61 हजार रुपये रोख असा 7 लाख 21 हजार रुपयांचा मुद्देमाल घरफोडी करुन चोरुन नेला आहे.