सातारा  : महाविकास आघाडीचे घटक पक्ष असणाऱ्या राष्ट्रवादी शरद पवार गट उद्धव बाळासाहेब ठाकरे गट आणि काँग्रेस या तीन पक्षाच्या वरिष्ठांनी बुधवारी सायंकाळी एकत्र येत स्थानिक स्वराज्य संस्थांच्या निवडणुकांच्या संदर्भाने महत्त्वपूर्ण चर्चा केली. जिल्ह्यातील एकमेव अ वर्ग नगरपालिका असणाऱ्या सातारा नगरपालिकेत प्रत्येकी 15 व मित्र पक्षांना पाच असा फॉर्म्युला ठरविण्यात आल्याची चर्चा आहे.

साताऱ्याचे सुप्रसिद्ध डॉ. संदीप काटे यांना नगराध्यक्ष पदाची ऑफर देण्यात आली असून जवळपास त्यांचे नाव निश्चित मानले जात आहे. बुधवारी रात्री उशिरा डॉ. काटे यांनी प्रदेशाध्यक्ष शशिकांत शिंदे यांच्याशी कमरा बंद खलबते केली. या बैठकीला ठाकरे गटाचे संपर्क मंत्री शिवव्याख्याते नितीन बानगुडे पाटील, माजी सहकार मंत्री बाळासाहेब पाटील, महाराष्ट्र नवनिर्माण सेनेचे शहराध्यक्ष राहुल पवार, राष्ट्रीय काँग्रेसच्या रजनी पवार  इत्यादी मान्यवर यावेळी उपस्थित होते .

सातारा जिल्ह्यातील नवनगरपालिका व मेढा नगरपंचायत निवडणुकीसाठी अर्ज भरण्यास प्रारंभ झाला आहे. त्या अनुषंगाने बैठकीत चर्चा झाली महाविकास आघाडी एकत्रित लढायची ठरले असून कोणत्या पक्षाने किती जागा लढवायच्या यावर चर्चा सुरू आहेत. ज्या पालिकेत ज्या पक्षाचा वर चष्मा आहेत तेथे जास्तीत जास्त जागा त्या पक्षाने लढवायच्या की नाही याविषयी रात्री उशिरापर्यंत चाचणी सुरू होती. सातारा पालिका मात्र भारतीय जनता पार्टीच्या दृष्टीने अत्यंत महत्त्वाचे असल्याने महाविकास आकाडीने सुद्धा तेथे मजबूत रणनीती आखण्यास प्रारंभ केला आहे. साताऱ्यात समविचारी पक्षांनी एकत्र येऊन प्रत्येकी 15 जागा आणि मित्र पक्षांना पाच जागा देऊन संपूर्ण पॅनेल महायुतीच्या विरोधात उभे करायचे याबाबत निर्णय रात्री उशिरा झाल्याचे खात्री लायक वृत्तांची माहिती आहे.

राष्ट्रवादीकडे सुद्धा इच्छुकांची गर्दी

राष्ट्रवादी शरद पवार राष्ट्रवादी काँग्रेस गटाचे प्रदेशाध्यक्ष शशिकांत शिंदे यांच्याकडे इच्छुकांची गर्दी झाली आहे. दुपारी तीन वाजल्यापासून राष्ट्रवादी भवनामध्ये मॅरेथॉन बैठका सुरू होत्या. नगराध्यक्षपदासाठी माजी उपनगराध्यक्ष बाळासाहेब बाबर, पत्रकार सुजित आंबेकर,  शहर पत्रकार संघाचे माजी अध्यक्ष शरद काटकर, संतोष उर्फ नाना इंदलकर इत्यादी लोकांनी इच्छा व्यक्त केली आहे. तसेच सूर्यप्रभा हॉस्पिटलचे संचालक व सातारा हाफ हिल मॅरेथॉनचे संस्थापक डॉक्टर संदीप काटे यांचे सुद्धा नाव पुढे आले असून डॉ. काटे यांनी शशिकांत शिंदे यांच्याशी अर्धा तास कमरा बंद चर्चा केली. 

या चर्चेमध्ये एकूणच तयारीचा आढावा घेण्यात आला.सातारा शहरात महाविकास आघाडीला किती पाठिंबा मिळू शकेल तसेच एकूण मतदार संख्या प्रभाग निहाय महाविकास आघाडीची मांडणी त्याचबरोबर जनतेसाठी तयार करावयाचा जाहीरनामा इत्यादी विषयांवर शशिकांत शिंदे यांनी प्रत्येक उमेदवाराशी सखोल चर्चा केल्याची माहिती आहे.

उद्धव बाळासाहेब ठाकरे गटाची सुद्धा तयारी

उद्धव बाळासाहेब ठाकरे गटाच्या बंडखोरांना सध्या तरी थांबवण्यात संपर्क सूत्रांना यश आले आहे. काही नाराज अद्यापही तळ्यात मळ्यात असल्याने राष्ट्रवादी गटाकडून कडवी लढत दिली जाणार का याविषयी साशंकता आहे. वादग्रस्त ठरलेल्या काही निवडीवरून शिवसैनिक नाराज आहेत. त्यामुळे रात्री उशिरापर्यंत लिंबखिंड परिसरात गोपनीय ठिकाणी बाळासाहेब ठाकरे गटाच्या रात्री उशिरापर्यंत बैठका सुरू होत्या. येत्या दोन दिवसांमध्ये ठाकरे गटाच्या सुद्धा नगरसेवक पदाच्या मुलाखती घेतल्या जाणार आहेत. याशिवाय राष्ट्रवादी शरद पवार गटाच्या मुलाखती गुरुवारी सकाळी अकरा वाजल्यापासून सुरू होत आहेत. त्यामुळे येत्या दोन दिवसात महाविकास आघाडीची सर्व पक्षांची नावे अंतिम होऊन यादी जाहीर केली जाणार आहे. शुक्रवार, शनिवार ही दोनच दिवस कामकाजाचे असून त्या दिवशी अर्ज भरले जातील आणि पक्षाचा एबी फॉर्म बंडखोरी टाळण्याच्या दृष्टीने सोमवारी दिला जाईल अशी चिन्हे आहेत.