​नवी दिल्ली : नीट पेपरफुटीच्या प्रकरणावरून केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करत गेल्या २० दिवसांपासून आमरण उपोषणाला बसलेले प्रसिद्ध सामाजिक कार्यकर्ते सोनम वांगचुक यांना दिल्ली पोलिसांनी शनिवारी सकाळी आंदोलनस्थळावरून ताब्यात घेऊन रुग्णालयात दाखल केले. वांगचुक यांची प्रकृती चिंताजनक बनल्याने उच्च न्यायालयाच्या आदेशानुसार आणि वैद्यकीय सल्ल्याने ही कारवाई करण्यात आली असून, या घडामोडींमुळे जंतर-मंतर परिसरात काही काळ प्रचंड तणाव निर्माण झाला होता.

​शनिवारी सकाळी साध्या वेशात आलेल्या दिल्ली पोलिसांच्या पथकाने जंतर-मंतर येथे कोणतीही पूर्वकल्पना न देता अचानक ही कारवाई केली. पोलिसांना पाहताच तेथे उपस्थित असलेल्या कार्यकर्त्यांनी आणि आंदोलकांनी कडाडून विरोध केला. यावेळी पोलिसांनी अत्यंत वेगाने सोनम वांगचुक यांच्याभोवती पांढऱ्या चादरींचे कवच तयार करून त्यांना गाडीत बसवले आणि थेट रुग्णालयाकडे रवाना केले. कार्यकर्त्यांनी पोलिसांच्या विरोधात जोरदार घोषणाबाजी करत अडथळा आणण्याचा प्रयत्न केला, मात्र पोलिसांनी संयम बाळगत परिस्थिती नियंत्रणात आणली. सध्या वांगचुक यांना सफदरजंग रुग्णालयातील अतिदक्षता विभागात (आयसीयू) दाखल करण्यात आले असून, जंतर-मंतर परिसरामध्ये मोठा पोलीस बंदोबस्त तैनात करण्यात आला आहे.

​पोलिसांनी दिलेल्या स्पष्टीकरणानुसार, उपोषणामुळे सोनम वांगचुक यांचे वजन ५६ किलोपर्यंत घटले होते आणि त्यांची तब्येत सातत्याने खालावत चालली होती. त्यामुळे न्यायालयाच्या सूचनेनुसार केवळ त्यांच्या जिवाला असलेला धोका टाळण्यासाठीच त्यांना वैद्यकीय उपचारांसाठी हलवण्यात आले आहे. तसेच पोलिसांनी इतर आंदोलकांनाही हे ठिकाण शांततापूर्ण मार्गाने रिकामे करण्याचे आवाहन केले आहे.

​दरम्यान, या कारवाईच्या काही तास आधी म्हणजेच शुक्रवारी उशिरा रात्री जंतर-मंतरवर सोनम वांगचुक यांच्यावर काही अज्ञात समाजकंटकांकडून वस्तू फेकून हल्ला करण्याचा प्रयत्न झाल्याचा आरोप आंदोलक कार्यकर्त्यांकडून करण्यात आला आहे. आंदोलन विस्कळीत करण्यासाठी काही लोकांना पाठवले जाणार असल्याची पूर्वकल्पना आधीच मिळाली होती, असा दावाही कार्यकर्त्यांनी केला असून वांगचुक यांच्या सुरक्षेबाबत चिंता व्यक्त केली आहे. सोनम वांगचुक आणि त्यांच्या समर्थकांनी आपल्या मागण्यांसाठी २० जुलै रोजी संसदेवर धडक मोर्चा काढण्याची घोषणा केली होती. हा नियोजित मोर्चा अवघ्या दोन दिवसांवर आलेला असतानाच पोलिसांनी ही मोठी कारवाई केली आहे.