सातारा : सातारा जिल्ह्यात रविवारी आदिशक्तीच्या नवरात्रोत्सवाचा भक्तिमय जागर सुरू झाला. जिल्ह्यातील प्रसिद्ध देवीस्थाने, डोंगरावरील शक्तिपीठे आणि शहरातील सार्वजनिक नवरात्रोत्सव मंडळांमध्ये उत्साहाचे वातावरण निर्माण झाले आहे. मंदिरांची रंगरंगोटी, आकर्षक विद्युत रोषणाई, घटस्थापनेची लगबग, देवीच्या स्वागतासाठी निघालेल्या मिरवणुका आणि दर्शनासाठी भाविकांची गर्दी यामुळे संपूर्ण जिल्हा नवरात्रमय झाला आहे.
नवरात्रोत्सवाच्या स्वागतासाठी जिल्ह्यातील प्रमुख देवी मंदिरांमध्ये विशेष तयारी करण्यात आली आहे. वाई येथील मांढरदेवीची काळूबाई, औंधची यमाई देवी, साताऱ्याजवळील डोंगरावरील जानाई-मळाई, अजिंक्यतारा किल्ल्यावरील मंगळाई देवी, जावळी तालुक्यातील घाटवण येथील घाटाई देवी, शेंद्रे येथील अजिंक्यतारा सहकारी साखर कारखान्यावरील कुलस्वामिनी तुळजाभवानी आणि सातारा शहरातील मंगळवार तळ्यावरील तुळजाभवानी मंदिरांत सजावट व विद्युत रोषणाईने उत्सवी वातावरण निर्माण झाले आहे. मंदिर परिसराच्या स्वच्छतेसह भाविकांच्या दर्शनासाठी आवश्यक नियोजनावर भर देण्यात आला आहे. नवरात्राच्या पहिल्याच दिवशी पहाटेपासून देवीच्या दर्शनासाठी भाविकांची वर्दळ सुरू झाली.
नवरात्राच्या पहिल्या दिवशी घराघरांत घटस्थापनेची लगबग दिसून आली. महिलांनी शुभमुहूर्तावर घटस्थापना करून नऊ दिवसांच्या उपासनेला प्रारंभ केला. घटासाठी लागणारी माती, धान्य, वेली, पूजासाहित्य आणि फुलांच्या खरेदीसाठी बाजारपेठांमध्ये गर्दी झाली होती. पारंपरिक धार्मिक विधी, देवीची आरास आणि उपवासाच्या संकल्पातून घरोघरी भक्तिमय वातावरण निर्माण झाले.
सातारा शहरातील मोती चौक, गोलबाग, राजवाडा, सदर बाजार यांसह विविध भागांतील सार्वजनिक नवरात्रोत्सव मंडळांमध्येही उत्साह शिगेला पोहोचला आहे. देवीच्या स्वागतासाठी आकर्षक सजावट, रोषणाई आणि मिरवणुकांची तयारी करण्यात आली. ढोल-ताशांचा गजर, देवीचा जयघोष आणि भाविकांचा उत्स्फूर्त सहभाग यामुळे शहरातील प्रमुख चौकांत उत्सवी चैतन्य अनुभवायला मिळत आहे. पारंपरिक श्रद्धेला सार्वजनिक उत्सवाचे स्वरूप मिळाल्याने नवरात्राच्या पहिल्याच दिवसापासून शहरातील वातावरण भक्तिरंगात रंगले आहे.
नवरात्रोत्सवाचा प्रभाव बाजारपेठांमध्येही जाणवू लागला आहे. पूजासाहित्य, फुले, नारळ, ओटीचे साहित्य आणि घटस्थापनेसाठी आवश्यक वस्तूंच्या खरेदीला वेग आला आहे. नऊ दिवस उपवास करणाऱ्या भाविकांमुळे साबुदाणा, राजगिरा, शेंगदाणे आणि अन्य उपवासाच्या पदार्थांना मागणी वाढली आहे. सफरचंद, डाळिंब, केळी यांसह विविध फळांच्या खरेदीतही उत्सवामुळे वाढ झाली आहे. त्यामुळे किरकोळ विक्रेते आणि फळविक्रेत्यांच्या व्यवसायाला चालना मिळण्याची अपेक्षा आहे.
पावसाची तूट, पाणीटंचाईची शक्यता आणि शेतीच्या भवितव्याबाबतची चिंता ग्रामीण भागात कायम आहे. अशा परिस्थितीत नवरात्रोत्सवातून मिळणारी मानसिक ऊर्जा आणि आदिशक्तीवरील श्रद्धा भाविकांसाठी महत्त्वाची ठरत आहे. संकटांवर मात करण्याचे बळ मिळावे, कुटुंबात सुख-समृद्धी नांदावी आणि शेतीला चांगले दिवस यावेत, अशी प्रार्थना करीत भाविकांनी नवरात्राच्या पहिल्या दिवसापासून देवीच्या चरणी माथा टेकविला. भक्ती, परंपरा आणि उत्साह यांच्या संगमातून सातारा जिल्ह्यात आदिशक्तीच्या जागराला प्रारंभ झाला आहे.