सातारा : बंद असलेल्या स्क्रॅप दुकानाचे पत्र्याचे शेड उघडून आत प्रवेश करीत माल चोरण्याचा प्रयत्न केल्याचा प्रकार शेंद्रे येथे उघडकीस आला आहे. याप्रकरणी 19 वर्षीय तरुणीविरोधात सातारा तालुका पोलीस ठाण्यात गुन्हा दाखल करण्यात आला आहे. गुरुवारी (दि. 30) दुपारी एकच्या सुमारास ही घटना घडली.
समीर मोहम्मद खान (वय 22) यांनी याबाबत फिर्याद दिली आहे. त्यांच्या घरासमोरच खान यांचे स्क्रॅपचे दुकान आहे. दुकानाचे पत्र्याचे शेड बंद असताना तरुणीने कशाच्या तरी साहाय्याने शेडचा दरवाजा उघडल्याचे फिर्यादीत म्हटले आहे. त्यानंतर दुकानात प्रवेश करून स्क्रॅप माल चोरण्याचा प्रयत्न करीत असताना ती आढळून आल्याचा आरोप आहे. याप्रकरणी सातारा तालुका पोलीस ठाण्यात गुन्हा नोंदविण्यात आला आहे. सहायक फौजदार सी. बी. माने पुढील तपास करीत आहेत.