सातारा : कर्तव्य बजावत असताना गुन्ह्यांचा तपास न केल्यामुळे सातारा शहर पोलीस ठाण्यातील दोन पोलिसांवर थेट गुन्हा दाखल करण्यात आला आहे. वरिष्ठांच्या आदेशाची अवहेलना केल्याप्रकरणी ही कारवाई करण्यात आली असून, या दोन्ही पोलिसांकडून तब्बल 25 गुन्ह्यांचा तपास प्रलंबित होता.

यामध्ये पोलीस नाईक आर. व्ही. पाटील आणि पोलीस नाईक एस. ए. गावीत यांचा समावेश आहे. पोलीस नाईक आर. व्ही. पाटील, जे 2015 ते 2019 दरम्यान सातारा शहर पोलीस ठाण्यात कार्यरत होते आणि सध्या पोलीस मुख्यालय येथे सेवा बजावत आहेत. त्यांनी 2 गुन्हे, 1 बेपत्ता व्यक्तीचा (मिसींग) तपास आणि 7 मृत्यू प्रकरणांचे तपास पूर्ण केले नाहीत.

दुसरे पोलीस एस. ए. गावीत, जे 2018 ते 2019 या काळात सातारा शहर पोलीस ठाण्यात होते आणि सध्या कराड शहर पोलीस ठाण्यात कार्यरत आहेत. त्यांनी 6 गुन्हे, 6 बेपत्ता व्यक्तींचा (मिसींग) तपास आणि 3 मृत्यू प्रकरणांचे तपास केले नाहीत.

या दोन्ही पोलिसांना त्यांच्या वरिष्ठांनी अनेक वेळा लेखी आणि तोंडी स्वरूपात हे प्रलंबित तपास पूर्ण करण्याच्या सूचना दिल्या होत्या. असे असूनही, त्यांनी जाणीवपूर्वक हे गुन्हे प्रलंबित ठेवले. अखेर, बुधवारी सातारा शहर पोलीस ठाण्यात त्यांच्यावर गुन्हा दाखल करण्यात आला. ही कारवाई वरिष्ठांच्या आदेशाचा अवमान केल्याप्रकरणी करण्यात आली आहे.