पुसेगाव  : पुसेगाव येथील सेवागिरी विद्यालयातील विद्यार्थ्यांवर मधमाश्यांनी अचानक हल्ला केल्यामुळे एकच खळबळ उडाली. मधमाश्यांनी चावा घेतल्याने 11 विद्यार्थी जखमी झाले आहेत. त्यांना वाचविण्याच्या प्रयत्नात मुख्याध्यापकांसह चार शिक्षकही जखमी झाले.

पुसेगाव येथे एकाच प्रांगणात रयत शिक्षण संस्थेचे सेवागिरी विद्यालय आणि कला व वाणिज्य महाविद्यालय आहे. विद्यालयात इयत्ता पाचवी ते दहावीपर्यंत वर्ग आहेत. बुधवारी दुपारी विद्यालयात नेहमीप्रमाणे अध्यापनाचे काम सुरू होते. त्यावेळी कला व वाणिज्य महाविद्यालयाच्या इमारतीच्या खिडकीवर असलेल्या मधमाश्यांच्या पोळ्यावरील मधमाश्यांनी उडून वर्गातील विद्यार्थ्यांवर हल्ला करत चावा घेतला. 

यामुळे विद्यार्थी आरडाओरड करु लागल्याने विद्यालयाच्या मुख्याध्यापकांसह शिक्षकांनी धाव घेतली. मधमाशांनी हल्ला केल्यामुळे एकच खळबळ उडाली. शिक्षकांनी शाळेतील सर्वच मुलांना या हल्ल्यातून सुखरूप वाचवले. जखमी पाच विद्यार्थ्यांना खाजगी रुग्णालयात दाखल केले. मधमाशा चावल्यानंतर काही जणांना सूज, चक्कर येण्याचा त्रास होत होता. या विद्यार्थ्यांची प्रकृती स्थिर असल्याची माहिती डॉक्टरांनी दिली.