मुंबई : अभिनेता सैफ अली खानच्या घरात १५ जानेवारी रोजी चोरीच्या उद्देशाने एक चोर शिरला होता. मात्र, त्या चोराने अभिनेता सैफ अली खान याच्यावर प्राणघातक हल्ला केल्याने या घटनेनंतर मुंबई पोलिसांनी हल्लेखोर चोराला पकडण्यासाठी ३५ पोलीस पथक निर्माण केली होती. त्यातच घटनेच्या तिसऱ्या दिवशी मुंबई व ठाणे पोलिसांनी संयुक्त कारवाई करत ठाण्यातील हिरानंदानी भागात असलेल्या मजुरांच्या वासाहतीच्या परिसरातून खरा आरोपी मोहम्मद शरीफुलला ताब्यात घेऊन अटक केली आहे. मात्र त्यापूर्वी रेल्वे पोलिसांनी एका संशयिताला ताब्यात घेतलं होतं. पण तो आरोपी नसल्यानं त्याला चौकशी करून सोडून दिलं, या घटनेनंतर त्या तरुणासह कुटूंबाला मानसिक धक्का बसला असून माझा मुलगा वेडा झाला आहे, त्याला आता नोकरी कोण देणार, असा प्रश्न त्याच्या वडिलांनी उपस्थित केला आहे. त्याचं जीवन पोलिसांच्या चुकीमुळे उद्ध्वस्त झाल्याचा दावा त्याचे वडील कैलाश कनोजिया यांनी केला आहे. तर आकाश कनोजिया (३१) असे त्या तरुणाचं नाव आहे 

मिळालेल्या माहितीनुसार, अभिनेता सैफ अली खान प्रकरणी ताब्यात घेतलेला आकाश कनोजिया हा टिटवाळा नजीक नांदप गावातील इंदिरानगर भागातील एका चाळीत आई वडिलांसह राहतो. घटनेच्या दिवशी कल्याणहून मूळ गाव असलेल्या छत्तीसगडमधील छापा येथे जात होता. त्याच वेळी त्याला दुर्ग रेल्वे पोलिसांनी ताब्यात घेऊन मुंबई पोलिसांच्या ताब्यात दिले. त्यानंतर मुंबई पोलिसांनी त्याची ८ ते १० तास चौकशी केल्यानंतर त्याला सोडून दिले. मात्र त्याला पोलिसांनी खातरजमा न करताच ताब्यात घेतल्यानं त्याच्या कुटूंबाला धक्का बसला आहे.

दरम्यान, अशा प्रकारच्या गुन्ह्यात माझ्या मुलाला आरोपी केल्यामुळे आता माझ्या मुलाला कोणी कामावर ठेवत नाही. मुंबई पोलिसांनी हा तोच आरोपी आहे का याची खातरजमा केली पाहिजे होती. माझ्या मुलासोबत जे घडलं ते चुकीचे झालं आहे. या घटनेचा, पोलिसांच्या वागण्याचा त्याच्या मनावर परिणाम झाला आहे त्याचं मन लागत नाही, तो वेडा झाला आहे. तो आमच्याशी सुद्धा नीट बोलत नाही. अनेक जण हेच सांगत होते की, फोटो मधील व्यक्ती आणि माझ्या मुलात कुठेच साधर्म्य नाही, असे म्हणत आकाशच्या वडिलांनी त्यांचा संताप व्यक्त केला. त्यांची ही कैफियत आता कोण ऐकणार का? आकाशचं उद्ध्वस्त झालेलं आयुष्य कधी सुरळीत होणार? असा प्रश्न सध्या उपस्थित होत आहे.