सातारा : सातार्‍यातील पोवई नाका येथे चालत्‍या एसटीमध्ये अल्‍पवयीन मुलीचा हात धरुन युवकाने विनयभंग केल्‍याची धक्‍कादायक घटना समोर आली आहे. याप्रकरणी सातारा शहर पोलीस ठाण्यात पोक्‍सोचा गुन्‍हा दाखल असून संशयित युवक पसार झाला आहे. दरम्‍यान, पुणे येथील घटना ताजी असतानाच सातार्‍यात एसटीत छेडछाडीची घटना घडल्‍याने मुलींचा प्रवास असुरक्षित झाल्‍याची भावना वाढू लागली आहे.

ओंकार घाडगे असे संशयित आरोपीचे नाव आहे.

याबाबत अधिक माहिती अशी, ही घटना दि. २ मार्च रोजी दुपारी घडली आहे. अल्‍पवयीन मुलगी एसटीमध्ये असताना संशयित आरोपीने मुलीला उद्देशून 'तू माझ्या आयुष्याचे वाटोळे केले आहे. तुला ज्यांनी माझ्यापासून लांब केले आहे त्‍यांना मी सोडणार नाही,' असे म्‍हणत मुलीचा हात धरला. या सर्व घटनेमुळे मुलगी घाबरुन गेली व एसटीमध्ये खळबळ उडाली. या सर्व घटनेनंतर मुलीच्या मैत्रिणीने फोन करुन मुलीच्या कुटुंबियांना माहिती दिली.