सातारा : शाहूपुरी चौकातील वाढती वाहतूक कोंडी, रस्त्यालगत बेकायदा उभारलेल्या बांधकामांमुळे निर्माण झालेली अरुंद जागा आणि नागरिकांची गैरसोय लक्षात घेऊन सातारा नगरपालिकेने अतिक्रमणविरोधी कारवाईला वेग दिला आहे. बुधवारी पालिकेच्या पथकाने शाहूपुरी चौक परिसरातील अतिक्रमणांवर थेट जेसीबी फिरवत रस्त्याच्या जागा मोकळ्या करण्यास सुरुवात केली. या कारवाईमुळे चौक परिसरातील व्यावसायिकांमध्ये मोठी खळबळ उडाली आहे.

मुख्याधिकारी विनोद जळक यांच्या मार्गदर्शनाखाली शहर विकास विभागाने ही मोहीम राबविली. अतिक्रमण निरीक्षक प्रशांत निकम, नगररचना सहाय्यक प्रथमेश मोरे यांच्यासह पालिका अधिकारी व कर्मचारी कारवाईत सहभागी झाले होते. जेसीबी, डंपर आणि टिप्परच्या सहाय्याने पक्क्या भिंती, पत्र्यांचे शेड, लोखंडी सांगाडे तसेच विविध फलक हटविण्यात आले. संभाव्य विरोध लक्षात घेऊन पोलिस बंदोबस्तही तैनात करण्यात आला होता.

नोटिसा देऊनही अतिक्रमणे कायम

एलआयसी कॉलनीसमोरील सर्व्हे क्रमांक 383 ब, प्लॉट क्रमांक 95 येथील  25 गाळेधारकांना 18 ऑगस्ट रोजी पालिकेने नोटिसा बजावल्या होत्या. रस्त्याच्या जागेत केलेले अतिक्रमण स्वतःहून हटविण्याच्या सूचना देऊनही संबंधितांकडून त्याची अंमलबजावणी झाली नाही. त्यामुळे पालिकेने अखेर प्रत्यक्ष कारवाईचा मार्ग स्वीकारला.

कारवाई सुरू झाल्यानंतर काही गाळेधारकांनी मुदत वाढवून देण्याची मागणी केली. मात्र, यापूर्वीच नोटिसा बजावण्यात आल्याचे प्रशासनाने स्पष्ट करत कारवाई सुरू ठेवली. काही ठिकाणी संबंधितांना स्वतःचे साहित्य बाजूला करण्यासाठी अल्प मुदत देण्यात आली.

चौकाच्या सुशोभीकरणासह वाहतूक सुधारण्याचा प्रयत्न

शाहूपुरी चौकाचे सुशोभीकरण आणि परिसरातील वाहतूक व्यवस्था सुरळीत करण्यासाठी ही मोहीम राबविण्यात येत असल्याचे पालिका प्रशासनाने स्पष्ट केले. सातारा-शाहूपुरी-माळवाडी-मेढा तसेच गेंडामाळ नाका ते मोळाचा ओढा या मार्गांवरील वाहतूक कोंडी कमी करण्यासाठी रस्त्याच्या कडेला अडथळा ठरणारी अतिक्रमणे हटविण्यावर भर देण्यात येत आहे.

येत्या दोन दिवसांत चौकातील उर्वरित अतिक्रमणांवरही कारवाई करून परिसर वाहतुकीसाठी अधिक खुला करण्याचा पालिका प्रशासनाचा प्रयत्न आहे. त्यामुळे शाहूपुरी चौक खरोखरच कोंडीमुक्त होणार का, याकडे नागरिकांचे लक्ष लागले आहे.