मुंबई : लाडकी बहीण योजनेत अपात्र महिलांचे अनेक प्रकरणे समोर येत असून, या योजनेत अनेक त्रुटी झाल्या आहेत, अशी स्पष्ट कबुली उपमुख्यमंत्री अजित पवार यांनी दिली आहे. "सरसकट सर्व महिलांना लाभ देणे चुकीचे होते. त्यामुळे आता अर्जांची पडताळणी सुरू आहे आणि यापुढे केवळ गरजू आणि पात्र महिलांनाच लाभ देण्यात येईल," असेही त्यांनी स्पष्ट केले. अजित पवार सोमवारी प्रसारमाध्यमांशी संवाद साधत होते.

या वेळी अजित पवार यांनी पुण्यातील कारागृह पोलीस महानिरीक्षक जालिंदर सुपेकर यांनी हगवणे बंधूंना दिलेल्या शस्त्र परवान्याविषयीही प्रतिक्रिया दिली. त्यांनी सांगितले, "पुणे शहरात याआधी कोणाला शस्त्र परवाने देण्यात आले, हे सविस्तर तपासले जाईल. मी बीडचा पालकमंत्री असताना अशाच काही तक्रारी आल्या होत्या. त्यावेळी संबंधित पोलिस अधीक्षकांनी फेरआढावा घेत अनेकांचे शस्त्र परवाने रद्द केले होते."

"2020 ते 2023 या काळात कोणाला लायसन्स देण्यात आले, त्याचीही चौकशी केली जाईल. त्यांची पार्श्वभूमी तपासूनच निर्णय घेतला जाईल. ज्यांना खरोखर गरज आहे, त्यांच्याकडेच शस्त्र परवाने राहू देतील. लायसन्स देण्याचा अधिकार जसा प्रशासनाकडे आहे, तसाच गरज पडल्यास तो रद्द करण्याचाही अधिकार आहे," असे अजित पवार यांनी ठामपणे सांगितले.

निलेश चव्हाण पोलिसांच्या ताब्यात असून त्याला अटक करून रिमांड मिळवण्यात आली आहे. पोलिसांकडून त्याच्याकडे चौकशी सुरू असून, त्याच्या घरातील लॅपटॉप, मोबाईल आणि इतर वस्तू जप्त करण्यात आल्या आहेत. आता पोलिस तपास करत आहेत आणि त्यातून काय माहिती समोर येते, ते पाहणं महत्त्वाचं असल्याचं उपमुख्यमंत्री अजित पवार यांनी स्पष्ट केलं.

आमच्यात कोणतीही बंद दाराआड बैठक झाली नाही: जयंत पाटील

दरम्यान, अजित पवार आणि जयंत पाटील यांच्यातील भेटीच्या चर्चेला नवसंजीवनी मिळाली आहे. दोन्ही राष्ट्रवादी पक्ष एकत्र येणार का? पवार काका-पुतण्याचं मनोमीलन होणार का? यावर चर्चेची झळाळी वाढली असतानाच रविवारी पुण्यात वसंतदादा साखर संकुलात झालेल्या बैठकीत शरद पवार आणि अजित पवार एकत्र दिसले. या बैठकीत दोन्ही नेते शेजारी बसले होते. साखर संकुलाची औपचारिक बैठक संपल्यानंतर शरद पवार, अजित पवार आणि जयंत पाटील यांच्यात बंद दाराआड आणखी एक बैठक झाली, अशी माहिती समोर आली आहे.

गेल्या काही दिवसांत पवार काका-पुतणे काही कार्यक्रमांमध्ये एकत्र व्यासपीठावर दिसले होते आणि त्यांच्यात संवादही झाल्याचं पाहायला मिळालं होतं. त्यामुळे या हालचालींना विशेष महत्त्व दिलं जात आहे. पुढील साखर संकुलाची बैठक ९ जून रोजी पुण्यात होणार असून, त्यातही काका-पुतणे उपस्थित राहण्याची शक्यता आहे.

मात्र, या पार्श्वभूमीवर कोणतीही बंद दरवाज्यामागची चर्चा किंवा बैठक झाली नसल्याचं स्पष्टीकरण राष्ट्रवादी शरदचंद्र पवार पक्षाचे प्रदेशाध्यक्ष जयंत पाटील यांनी दिलं आहे. त्यामुळे या भेटीमागचं गूढ अद्याप सुटलेलं नाही.