मुंबई: राजगड जिल्ह्यातील खालापूरजवळी इर्शाळगडाच्या पायथ्याशी असणाऱ्या इर्शाळवाडीतील अनेकांसाठी १९ जुलैची रात्र शेवटची रात्र ठरली. दरड कोसळून घडलेल्या दुर्घटनेनंतर संपूर्ण गाव ढिगाऱ्याखाली गेले. ३ दिवसानंतर मृतांचा आकडा वाढण्याची शक्यता आहे. या दुर्घटनेतील बेपत्ता लोकांचा शोध घेतला जातोय. इर्शाळवाडीत अजूनही बचावकार्य सुरू आहे. या घटनेनंतर सोशल मीडियावर अनेक नेटकऱ्यांनी पोस्ट करत संवेदना व्यक्त केल्या. शिवाय मदतीचा हातही देऊ केला. अभिनेत्री जुई गडकरीने काही दिवसांपूर्वी इर्शाळगडावर तिने केलेल्या ट्रेकच्या आठवणी जाग्या केल्या होत्या. आता अभिनेत्रीने या ठिकाणच्या लोकांसाठी मदतीचा हात देऊ केला आहे. अभिनेत्रीने तिच्या इन्स्टाग्राम स्टोरीमधून इर्शाळवाडीतील लोकांना मदतीचे आवाहन केले आहे.

जुईने शेअर केलेल्या इन्स्टाग्राम स्टोरीमध्ये असे लिहिले आहे की, 'इर्शाळवाडीसाठी मदत पाठवायची असेल तर कृपया मला मेसेज करा. पंचे, चादरी, औषधे, कपडे, चपला, जेवण इ. जीवनावश्यक वस्तू तिथपर्यंत माझ्या टीमकडून पोहोचवल्या जातील.' अभिनेत्रीने तिच्या पोस्टमधून मदतीने आवाहन केले असून जुईची ही पोस्ट चर्चत आली आहे. अभिनेत्रीच्या पोस्टनुसार तिच्या टीमच्या माध्यमातून तिच्या चाहत्यांना इर्शाळवाडीवासियांना मदत करता येईल.

जुई इर्शाळगड याठिकाणी काही दिवसांपूर्वी ट्रेकसाठी गेली होती. तिने या ट्रेकदरम्यानत्या इर्शाळवाडीतील आठवणी शेअर केलेल्या. तिने त्याठिकाणी राहणाऱ्या रहिवाशांच्या हातचं जेवण जेवल्याची आठव सांगितली. ही बातमी पाहताच अभिनेत्रीने याठिकाणी ढिगाऱ्याखाली अडकलेल्या लोकांसाठी प्रार्थना केली होती.

इर्शाळवाडी गावावर दरड कोसळल्याने आतापर्यंत २२ जणांचा मृत्यू झाल्याचे समोर आले असून ८६ जण अद्यापही बेपत्ता आहेत. गेले तीन दिवस या ठिकाणी अहोरात्र बचावकार्य सुरु आहे. याठिकाणी पर्यटकांच्या गर्दीमुळे बचाव कार्यात अडथळा निर्माण होत असल्याचेही समोर आले आहे. या वाढणाऱ्या गर्दीमुळे अधिकाऱ्यांनी शुक्रवारी निर्बंध घातले आहेत. याठिकाणी पोहोचण्यासाठी पक्का रस्ता नसल्याने NDRF आणि प्रशासनाच्या मदत यंत्रणांना जेसीबी किंवा पोकलेन घटनास्थळापर्यंत नेणे अशक्य होत आहे. दरम्यान याठिकाणावरुन समोर आलेले विविध फोटो आणि व्हिडिओ हृदयद्रावक असून विविध ट्रेकर्सही बचावकार्यात सहकार्य करत आहेत.