वडीगोद्री (जि. जालना): मराठा समाजाच्या जात प्रमाणपत्रांच्या मुद्द्यावरून महाराष्ट्रातील राजकीय वातावरण पुन्हा एकदा चांगलेच तापले आहे. मराठा आरक्षण आंदोलनाचे नेते मनोज जरांगे पाटील यांनी वडीगोद्री येथे पत्रकारांशी बोलताना राज्य सरकारसह सत्ताधारी भाजप नेत्यांवर जोरदार हल्लाबोल केला. "भाजपचे मंत्री चंद्रशेखर बावनकुळे यांनी मराठ्यांचे कुणबी प्रमाणपत्र रद्द करण्याचे लेखी आदेश दिले आहेत, यापेक्षा आणखी कोणता पुरावा हवा?" असा थेट सवाल करत त्यांनी आमदार प्रवीण दरेकर यांनाही चांगलेच सुनावले.

तुळजाभवानीच्या दर्शनाने पश्चिम महाराष्ट्र दौऱ्याचा श्रीगणेशा

आपल्या आगामी दौऱ्याची माहिती देताना जरांगे म्हणाले की, "आज तुळजापूर येथे आई तुळजाभवानीचे दर्शन घेऊन पश्चिम महाराष्ट्र दौऱ्याची सुरुवात करत आहे. या दौऱ्यात मराठा समाजातील विविध घटकांशी गाठीभेटी घेतल्या जातील. समाजाच्या समस्या जाणून घेण्यासोबतच मराठ्यांपुढे जाणूनबुजून कोणत्या अडचणी निर्माण केल्या जात आहेत, याची सविस्तर माहिती समाजासमोर मांडली जाईल."

'दरेकरांनी आधी बावनकुळेंचे पत्र पाहावे अन् मग बोलावे'

कुणबी प्रमाणपत्र रद्द करण्याच्या मुद्द्यावरून प्रवीण दरेकर यांनी केलेल्या विधानावर आक्रमक होत जरांगे म्हणाले, "दरेकरांनी आधी खरी सत्यता जाणून घ्यावी आणि मगच विधाने करावीत. त्यांनी पक्षाच्या वरिष्ठ नेत्यांच्या आहारी जाऊन मराठा समाजाच्या विरोधात बोलू नये. गंगाखेडमध्येही प्रमाणपत्र रद्द करण्याचा तोच प्रकार करण्यात आला आहे. आधी कागदपत्रे आणि आदेश पाहा आणि मग बोला."

"मराठ्यांच्याच कुणबी प्रमाणपत्रांची मीडिया ट्रायल का?"

कुणबी जात प्रमाणपत्राच्या पडताळणी प्रक्रियेवर प्रश्न उपस्थित करत जरांगे म्हणाले की, "प्रमाणपत्र पडताळणीची कायदेशीर प्रक्रिया सर्वांसाठीच असते, मग केवळ मराठा समाजाच्याच प्रकरणाची मीडिया ट्रायल का केली गेली? मराठ्यांमध्ये गैरसमज पसरवून समाजात फूट पाडण्याचा आणि मराठ्यांच्याच विरोधात छत्रपती संभाजीनगरात आंदोलन उभे करण्याचा कट होता का?" असा संतप्त सवाल त्यांनी केला. तसेच "दरेकर आणि बावनकुळेंच्या चुकीच्या कारभारावर फडणवीस माझ्याकडून नक्कीच बोलले जातील, त्यामुळे त्यांनी नीट वागावे," असा कडक इशाराही त्यांनी दिला.