सातारा : येथील त्रिरत्न बौद्ध महासंघ या जागतिक भ्रातृभाव जपणाऱ्या धम्म चळवळीच्यावतीने संविधान दिवस गोडोलीच्या जेतवन बुद्धविहारात मोठ्या उत्साहात साजरा करण्यात आला.

यावेळी उपस्थित धम्ममित्र व धम्मचारी यांनी संविधानाच्या उद्देशिकेचे सामूहिक वाचन केले. लोकशाहीच्या बळकटीकरणासाठी आणि रक्षणासाठी सर्वजण कटिबद्ध होऊयात. अशी प्रतिज्ञा घेतली. भारतीय संविधानाला यावर्षी ७५ वर्षे पूर्ण होत आहेत. याचे औचित्य साधून या अमृतमहोत्सवी वर्षात संविधान जनजागृती व संविधान सन्मान कार्यक्रम जिल्हाभर राबविण्यात येणार असल्याचे यावेळी धम्मचारी संघादित्य यांनी सांगितले. डॉ.बाबासाहेब आंबेडकर यांच्या प्रखर बुद्धिमत्ता, त्यागामुळे व कष्टामुळेच या देशाला संविधान मिळाले. स्वातंत्र्य, समता, बंधुता आणि न्याय या चतुःसूत्रीने देशातील सर्व नागरिकांना एका धाग्यात बांधले.

संविधानाप्रति कृतज्ञता व्यक्त करताना धम्ममित्र विकास लादे, अरुणा मस्के व प्रवीण धस्के यांनी आपले विचार मांडले. सूत्रसंचालन धम्ममित्र मिलिंद कांबळे यांनी केले, तर प्रास्ताविक व आभार धम्मचारी संघादित्य यांनी मानले. कार्यक्रमास बहुसंख्येने धम्ममित्र बंधू भगिनी उपस्थित होत्या.