लोणंद : येथील एसटी बसस्थानकासमोर एसटी बसच्या चाकाखाली सापडून वृद्ध जागीच ठार झाला. सोपान महादेव रिटे (वय ७५, रा. तरडफ, ता. फलटण) असे मृताचे नाव आहे. या अपघाताची नोंद रात्री उशिरापर्यंत लोणंद पोलिस ठाण्यात करण्याचे काम सुरू होते. आज सायंकाळी सातच्या सुमारास हा अपघात झाला.

लोणंद एसटी बसस्थानकासमोर पुणे- सातारा रस्त्यावर सायंकाळी सात वाजण्याच्या सुमारास सोपान महादेव रिटे हे पाय चालत निघाले होते. या वेळी बसस्थानकातून बाहेर आलेल्या पारगाव-खंडाळा आगाराची नीरा-सातारा एसटी बस (एमएच ०७ सी ७०९८) ही सातारा बाजूकडे निघाली होती. महादेव रिटे या एसटी बसच्या चाकाखाली सापडले. यात ते जागीच ठार झाले.