फलटण : एका कंपनीच्या बदनामीची धमकी देऊन खंडणीची मागणी करून ती उकळल्या प्रकरणी एका विरोधात फलटण शहर पोलीस ठाण्यात गुन्हा दाखल करण्यात आला आहे.
याबाबत मिळालेली माहिती अशी, फलटण येथील के. बी. कंपनी खुटे रोड, सस्तेवाडी येथे आहे. या कंपनीच्या विरोधात सनी घनश्याम काकडे रा. मंगळवार पेठ, फलटण याने एका ग्रुप वर बदनामीकारक मेसेज टाकला. हा मेसेज वाचल्यानंतर कंपनीतील संदीप मोहन शिंदे रा. शिंदेवाडी, ता. फलटण यांनी सनी काकडे ला या बदनामीचे कारण विचारले असता त्याने शिंदे यांच्याकडे दहा लाख रुपये खंडणीची मागणी केली. नाहीतर मी अशाच पद्धतीने कंपनीची बदनामी करेल, अशी धमकी दिली. त्यावेळी सनी काकडे यांची मनधरणी केली असता त्याने 35000 ची मागणी केली. मागणीनंतर संदीप शिंदे यांनी एटीएम मध्ये जाऊन 33 हजार रुपये काढून सनी काकडे यांना दिले आणि उर्वरित दोन हजार रुपये दुसऱ्या दिवशी देतो, असे सांगितले. उर्वरित रक्कम नाही मिळाली तर फलटण तालुक्यात तुमची कंपनी चालू देणार नाही व तुमच्या कंपनीच्या सर्व मॅनेजमेंट टीमवर खोटे गुन्हे दाखल करीन. तसेच माझ्याविरुद्ध पोलीस ठाण्यात तक्रार दिली तर तुला ठार मारेन, अशी धमकी काकडे याने शिंदे यांना दिली. त्या अनुषंगाने संदीप मोहन शिंदे यांनी सनी काकडे यांच्याविरोधात फलटण शहर पोलीस ठाण्यात फिर्याद दाखल केली आहे. अधिक तपास पोलीस निरीक्षक हेमंत शहा करीत आहेत.