विधानसभा निवडणुकीसाठी सचिन मोहिते यांची उमेदवारी नाकारली गेल्याने त्यांची नाराजी कायम होती. त्यामुळेच त्यांनी राष्ट्रवादीत प्रवेश केल्याची चर्चा आहे. सचिन मोहिते यांनी गेल्या चार वर्षांमध्ये शिवसेनेच्या माध्यमातून कोविड काळामध्ये रुग्णांना मदत, फायनान्स कंपन्यांच्या मुजोरीला लगाम, शैक्षणिक विद्यार्थ्यांच्या स्कॉलरशिपच्या अनुदानाचा प्रश्न, महाराष्ट्र वीज वितरण कंपनीच्या विरोधात रस्त्यावर उतरून आंदोलने, सातारकरांच्या टोल माफीसाठी केलेले जबरदस्त प्रयत्न यामुळे सातारा तालुक्यात शिवसेनेचा एक चेहरा तयार झाला होता. विधानसभा निवडणुकीमध्ये त्यांनी मातोश्री येथे जाऊन थेट शिवसेनाप्रमुख उद्धव ठाकरे यांची भेट घेतली होती.

मात्र ऐनवेळी ठाकरे गटाने राष्ट्रवादीतून आलेल्या अमित कदम यांना उमेदवारी दिली. त्यामुळे सचिन मोहिते हे नाराज असल्याची चर्चा होती. मात्र त्यांनी ती नाराजी जाहीर न करता पक्षादेश मानून अमित कदम यांच्या सर्व कार्यक्रमांना उपस्थिती लावत शिवसेनेची एकजूट दाखवली. मात्र शनिवारी अचानक त्यांनी शिवसेनेला ‘जय महाराष्ट्र’ करत फलटण येथे अजितदादा पवार यांच्या राष्ट्रवादी पक्षामध्ये एका जाहीर मेळाव्यात प्रवेश केला. महाविकास आघाडीला त्यामुळे सातार्‍यात खिंडार पडले आहे. महाविकास आघाडीकडून उमेदवार असणारे अमित कदम यांच्या प्रचार यंत्रणेला यामुळे धक्का बसलेला आहे.

सातारा व जावली तालुक्यातील शिवसैनिक या घटनेने संभ्रमित झाले आहेत. या संदर्भात शिवसेनेचे पश्चिम महाराष्ट्र संपर्कप्रमुख नितीन बानगुडे पाटील यांच्याशी संपर्क साधण्याचा प्रयत्न केला असता ते प्रतिक्रियांसाठी उपलब्ध झाले नाहीत.