सातारा : सातारा जिल्ह्यातील कराडमध्ये एक धक्कादायक घटना घडली. कृष्णा नदीच्या पुलावरून एका तरुणीने नदीत उडी मारली. ही घटना सोमवारी रात्री साडेनऊच्या सुमारास घडली असून कल्पना बाळाप्पा वाघमारे (वय 26) असं या तरुणीचं नाव आहे. कल्पना हिचं नुकतचं लग्न ठरलं होतं आणि दोन दिवसांपूर्वीच तिचा साखरपुडाही झाला होता. मात्र लग्नापूर्वीच तिने आपलं जीवन संपवलं असून या घटनेमुळे परिसरात खळबळ उडाली आहे.

मिळालेल्या माहितीनुसार, सोमवारी रात्री साडेनऊ वाजताच्या सुमारास कल्पना वाघमारे दुचाकीवरून कृष्णा पुलावर आली. तिने गाडी उभी केली आणि मोबाईलवर कोणाशी तरी बोलली. त्यानंतर कल्पनाने थेट नदीत उडी मारली. हे पाहून पुलावरील लोकांनी आरडाओरडा केला. काही वेळातच पुलावर मोठी गर्दी जमा झाली.

स्थानिकांकडून या घटनेची माहिती पोलिसांना देण्यात आली. त्यानंतर कराड शहर पोलीस घटनास्थळी दाखल झाले. पोलिसांनी तपास सुरू केला असता पुलावर तरुणीची दुचाकी आणि बॅग सापडली.

घटनेची माहिती मिळाल्यानंतर तरुणीशी लग्न ठरलेला मुलगा घटनास्थळी पोहोचला. तसंच कल्पनाचे कुटुंबीय आणि नातेवाईकही तिथं आले. पोलिसांनी तरुणीची बॅग आणि त्यातील साहित्य दाखवल्यानंतर कुटुंबीयांनी तिची ओळख पटवली. "कल्पनानेच नदीत उडी मारल्याचं स्पष्ट झालं," असं पोलिसांनी सांगितलं. आपल्या मुलीने टोकाचं पाऊल उचललं असल्याचं समजताच तरूणीच्या आईने हंबरडा फोडला. तसंच वडिलांनाही जबर धक्का बसला. आईसाठी हा धक्का इतका मोठा होता की नातेवाईकांनी धीर देत तरूणीच्या आईला थेट रूग्णालयात नेलं. 

दरम्यान, कल्पना वाघमारे एका खाजगी रुग्णालयात नोकरी करत होती. तिच्या बॅगमध्ये पर्स, ओळखपत्र आणि इतर साहित्य होतं. पोलिसांनी एनडीआरएफ टीमला बोलावले आणि स्थानिक मच्छीमारही मदतीला आले. पण अंधारामुळे शोध मोहीम थांबवण्यात आली. आज सकाळी पुन्हा तरुणीचा शोध सुरू करण्यात आला आहे.