पुणे : पंतप्रधान नरेंद्र मोदी हे गुरुवारी (दि.26) पुणे दौऱ्यावर येत आहेत. या निमित्ताने होणाऱ्या सभेवर पावसाचे सावट आले आहे. स. प. महाविद्यालयाच्या मैदानावर त्यांची सभा घेतली जाणार आहे. ही सभा यशस्वीपणे पार पाडण्यासाठी शहर भाजपकडून प्रयत्न सुरु असून, महापालिका प्रशासनालाही सतर्क राहावे लागणार आहे.

आगामी विधानसभा निवडणुकीच्या पार्श्वभूमीवर पुणे शहरातील मेट्रो प्रकल्पाच्या सिव्हिल कोर्ट ते स्वारगेट या मार्गाचे उद्घाटन आणि स्वारगेट ते कात्रज या मार्गाचे भूमिपूजन पंतप्रधान मोदी यांच्या हस्ते गुरुवारी होत आहे. यानंतर स. प. महाविद्यालय मैदानावर पंतप्रधान मोदी यांची सभा होत आहे. या सभेवर आता पावसाचे सावट आले आहे. गेल्या दोन दिवसांपासून शहरात पावसाने जोरदार हजेरी लावली. तसेच बुधवारी पुणे आणि परिसरात सोसाट्याच्या वाऱ्यासह जोरदार पाऊस पडण्याचा अंदाज वर्तविण्यात आला आहे.

दरम्यान, या सभेच्या ठिकाणी मंडप उभारण्याचे काम सुरु आहे. पावसामुळे मैदानात चिखल निर्माण झाला आहे. तसेच स्वारगेट, सारसबाग, स. प. महाविद्यालयाच्या परिसरातील रस्त्यांचे डांबरीकरणाचे काम महापालिकेने हाती घेतले असले तरी, पावसामुळे ते काम दर्जेदार होईल का ? याविषयी शंका निर्माण झाली आहे.

या कार्यक्रमादरम्यान राज्याचे मुख्यमंत्री एकनाथ शिंदे, उपमुख्यमंत्री अजित पवार, उपमुख्यमंत्री देवेंद्र फडणवीस हेही व्यासपीठावर उपस्थित राहणार आहेत. महायुती आघाडीच्या ताकदीचे प्रदर्शन म्हणून याकडे पाहिले जात आहे. या जाहीरसभेकडे आगामी विधानसभा निवडणुकीच्या प्रचाराची सुरुवात म्हणून पाहिले जात आहे.

पंतप्रधानांच्या दौऱ्यातील सुरक्षा लक्षात घेऊन जिल्हा प्रशासनाने जिल्ह्यात दोन दिवस पॅराग्लायडिंग, हॉट एअर बलून सफारी, ड्रोनचा वापर आणि मायक्रोलाइट यांसारख्या अवकाश उड्डाणांवर बंदी घातली आहे. कार्यक्रमादरम्यान कोणताही अनुचित प्रकार घडू नये म्हणून सुरक्षेच्या कारणास्तव हा निर्णय घेण्यात आला आहे.