पावसाळा सुरू आहे. पावसामुळे घराशेजारी साचलेलं पाणी, उगवलेल्या गवतामुळे घरात चिलट, मुंग्या, माश्या आणि इतर कीटकांचा वावर वाढतो. हे कीटक आरोग्यासाठी हानिकारक ठरू शकतात, अन्न दूषित करू शकतात आणि घरात अस्वच्छता निर्माण करू शकतात. यासाठी काही घरगुती उपायांचा वापर करणे फायदेशीर ठरते.

बाजारात उपलब्ध असलेल्या रासायनिक कीटकनाशकांपेक्षा घरगुती उपाय सुरक्षित, स्वस्त आणि पर्यावरणास अनुकूल असतात. चिलट, मुंग्या आणि माशांपासून घराचे संरक्षण करण्यासाठी काही सोपे आणि प्रभावी घरगुती उपाय आम्ही आपल्यासाठी घेऊन आलो आहोत. हे उपाय नैसर्गिक असल्याने पर्यावरणासाठी सुरक्षित असून आरोग्यासाठी हानिकारक नाहीत.

हे सोपे उपाय नक्की करून पाहा..

सर्वात प्रभावी उपाय-स्वच्छता :

कीटकांना आकर्षित करणारा सर्वात महत्त्वाचा घटक म्हणजे घरातील अस्वच्छता. स्वयंपाक घर, बाथरूम आणि घरातील इतर कोपरे नेहमी स्वच्छ ठेवावेत. साखर, अन्नपदार्थ किंवा सांडलेले अन्नपदार्थ उघड्यावर ठेवल्यास ते मुंग्या आणि माशांना आकर्षित करतात. त्यामुळे स्वच्छतेकडे विशेष लक्ष देणे आवश्यक आहे.

लिंबाचा रस आणि बेकिंग सोडा:

मुंग्यांपासून सुटका मिळवण्यासाठी लिंबाचा रस आणि बेकिंग सोडा यांचे मिश्रण अत्यंत प्रभावी आहे. ज्या ठिकाणी मुंग्यांचा वावर जास्त दिसतो, तिथे हे मिश्रण शिंपडल्यास मुंग्या दूर पळतात.

तुळस आणि कडुलिंबाची पाने:

चिलटांना घरात येण्यापासून रोखण्यासाठी तुळस आणि कडुलिंब खूप उपयुक्त आहेत. घराच्या खिडक्यांजवळ तुळशीचे रोप ठेवल्यास चिलट जवळ येत नाहीत. तसेच, कडुलिंबाच्या सुक्या पानांचा धूर केल्याने चिलट आणि माशांचा उपद्रव कमी होतो.

लवंग आणि नारळाचे तेल:

डासांपासून संरक्षणासाठी नारळाच्या तेलात लवंगाचे तेल मिसळून त्वचेवर लावल्यास डास दूर राहतात. रात्री झोपताना हा उपाय विशेषतः फायदेशीर ठरतो.

साबणाचे पाणी:

स्वयंपाकघरात दिसणाऱ्या माशांवर नियंत्रण मिळवण्यासाठी साबणाचे पाणी हा एक सोपा उपाय आहे. एका वाटीत थोडे पाणी घेऊन त्यात थोडा साबण टाकून ठेवा. माशा या पाण्याकडे आकर्षित होतात आणि त्यात अडकून मरतात.

कापसात सिट्रोनेला तेल:

सिट्रोनेला हे एक नैसर्गिक कीटकनाशक आहे. कापसाच्या बोळ्यावर सिट्रोनेला तेलाचे काही थेंब टाकून ते घराच्या कोपऱ्यात किंवा खिडक्यांजवळ ठेवल्यास चिलट, माशा आणि इतर कीटक घरात येत नाहीत.