सातारा : पुणे-बेंगलोर महामार्गावर कार अडवून कार मधील वीस लाखाचा मुद्देमाल चोरणे आणि चालकाला मारहाण करून त्याचे अपहरण करणे, या गंभीर गुन्ह्यांमध्ये भुईंज पोलीस व स्थानिक गुन्हे शाखा सातारा यांनी संयुक्तपणे कारवाई करून केरळ मधील सात जणांच्या टोळीला जेरबंद करण्यात आले आहे. त्यांच्याकडून एकूण रोख रक्कम 20 लाखांची रोकड व गुन्ह्यात वापरलेली वाहने असा 35 लाखांचा मुद्देमाल जप्त करण्यात आला आहे.

पोलीस अधीक्षक तुषार दोशी, अतिरिक्त पोलीस अधीक्षक वैशाली कडूकर यांनी संबंधित पोलिसांच्या टीमचे कौतुक केले आहे. विनीथ उर्फ राजन राधाकृष्ण वय 30 राहणार ओलीओपारा, नालेपल्ली जिल्हा पलक्कड राज्य केरळ, नंदकुमार नारायण स्वामी वय 32 राहणार चिथिरा हाऊस, जयराम कॉलनी चिराक्कड, पोस्ट कुम्मातूर मेदू  जिल्हा पलक्कड राज्य केरळ, अजिथकुमार वय 27 राहणार कांजीकुलम हाऊस, मराठी रोड कनिकुलम पोस्ट कालेपुल्ली जिल्हा पलक्कड, सुरेश के सावन वय 47 राहणार परिणाम कुर्सी, पोलपुल्ली पंचायत पोस्ट वेलकोली जिल्हा पलक्कड, विष्णू क्रिशनकुटी वय 29 राहणार उषा निवास सूर्यकॉलनी कारेकटू परांबू, पोस्ट अंबिकापुर जिल्हा पलक्कड, जिनू राघवन वय 31 राहणार कांजिराकडवू, पोस्ट मलांबुझा, जिल्हा पलक्कड, कलाधरण श्रीधरण राहणार चिनी कुलांबु पोस्ट वाहुल्यापुरम अलथुर थोनीप्पाडम, जिल्हा पलक्कड अशा सात जणांना अटक करण्यात आली आहे. या गुन्ह्यातील इतर सहा आरोपी फरार आहेत. 

याबाबतची अधिक माहिती अशी, पुणे-बेंगलोर महामार्गावर दिनांक 12 जुलै रोजी मध्यरात्री पावणेतीन च्या दरम्यान आरोपींनी स्कॉर्पिओ स्विफ्ट कारचा वापर करून एका हुंडाई गाडीला अडवून त्या गाडीची तोडफोड केली आणि गाडीतील चालकाचे अपहरण करून त्याच्याकडील रोख वीस लाख रुपये पळवले. चालकाला सर्जापूर फाटा तालुका जावळी येथे सोडून त्यांनी पलायन केले. याप्रकरणी विशाल हासबे वय 30 राहणार हिवरे तालुका खानापूर जिल्हा सांगली यांनी भुईंज पोलीस ठाण्यात फिर्याद दिली होती.

पोलीस अधीक्षक तुषार दोशी यांच्या सूचनेप्रमाणे भुईंज पोलीस स्टेशनचे सहाय्यक पोलीस निरीक्षक रमेश गर्जे व स्थानिक गुन्हे शाखेचे पोलीस निरीक्षक अरुण देवकर यांचा संयुक्त तपास सुरू झाला. सहाय्यक पोलीस निरीक्षक रोहित फार्णे, पोलीस ठाण्याचे पतंग पाटील यांच्या दोन पथकाने सांगली, कोल्हापूर येथे नाकाबंदी करत या टोळीचा तपास केला. गुन्हा केलेली इनोवा, स्कॉर्पिओ, स्विफ्ट ही वाहने विटा, तासगाव या रस्त्याने सांगली जिल्ह्यात गेल्याचे समजले. सांगली पोलिसांच्या सहकार्याने भुईंज पोलिसांनी योगेवाडी तालुका तासगाव येथे गुन्ह्यातील मुख्य आरोपी विनीथ ऊर्फ राजन याला अटक केली. त्यानंतर दोन्ही पथके केरळ राज्याकडे रवाना झाली. तांत्रिक विश्लेषण आणि कौशल्यपूर्ण तपास या माध्यमातून केरळ पोलिसांच्या सहकार्याने इतर सहा जणांना अटक करण्यात येऊन त्यांच्याकडील वीस लाख रुपये रोख व गुन्ह्यात वापरलेली वाहने असा 35 लाखाचा मुद्देमाल जप्त करण्यात आला. या टोळीवर केरळ, मध्य प्रदेश, तामिळनाडू, दिल्ली या राज्यांमध्ये दरोडा, जबरी चोरी, अपहरण, मारामारी यांसारखे गंभीर गुन्हे दाखल आहेत. 

या तपासामध्ये आतिश घाडगे, संतोष सपकाळ, शरद बेबले, लैलेश फडतरे, लक्ष्मण जगधने, प्रवीण फडतरे, अमित माने, स्वप्निल कुंभार, अविनाश चव्हाण, अरुण पाटील, गणेश कापरे, ओंकार यादव, मोहन पवार, विशाल पवार, रोहित निकम, पृथ्वीराज जाधव, वैभव सावंत, सचिन ससाणे, रविराज वर्णेकर, संकेत निकम, प्रवीण पवार, भुईंज पोलीस ठाण्याचे वैभव टकले, आप्पा कोलवडकर, नितीन जाधव, अमोल सपकाळ, सोमनाथ बल्लाळ, किरण निंबाळकर, सागर मोहिते, कराड शहर पोलीस ठाण्याचे अंमलदार हिरामण बामणे, प्रफुल्ल गाडे यांनी सहभाग घेतला होता.