सातारा : सातारा तालुक्यातील आरळे आणि वडूथ परिसरातील वीज वितरणाच्या डीपींमधून सुमारे 130 किलो वजनाची, 55 हजार रुपये किमतीची तांब्याची तार चोरीला गेल्याची घटना उघडकीस आली आहे. याप्रकरणी सातारा तालुका पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, 8 तारखेला रात्री साडेबारा वाजल्यापासून 18 तारखेला दुपारी तीन वाजेपर्यंतच्या कालावधीत ही चोरी झाली. आरळे येथील कॅनॉललगत, वडूथ येथील न्यू मोरे वस्ती परिसरातील रस्त्यालगत तसेच आरळे येथील पवार डीपीजवळील उसाच्या शेतातील डीपींमधून अज्ञात चोरट्याने तांब्याची तार चोरून नेली.
या तीन ठिकाणांहून अंदाजे 130 किलो तांब्याची तार चोरीला गेली असून, तिची एकूण किंमत 55 हजार रुपये असल्याचे फिर्यादीत नमूद करण्यात आले आहे.
याप्रकरणी वायरमन अमित लक्ष्मण कोळी (वय 35, रा. विकासनगर, सातारा) यांनी सातारा तालुका पोलीस ठाण्यात फिर्याद दाखल केली आहे. अज्ञात आरोपीविरुद्ध गुन्हा नोंदविण्यात आला असून, अधिक तपास पोलीस हवालदार फणसे करीत आहेत.