सातारा : महाराष्ट्र राज्यामध्ये सध्या संवेदनशील गुन्हे घडत आहेत. राज्यात घडत असलेल्या जातीय, धार्मिक घडामोडी तसेच आगामी काळात असलेले सण, उत्सव या अनुषंगाने कोल्हापूर परिक्षेत्राचे विशेष पोलीस महानिरीक्षक सुनिल फुलारी यांनी सातारा जिल्ह्याची आढावा बैठक आज दि. 28 रोजी घेतली.
बैठकीमध्ये महाराष्ट्र राज्यात सध्या घडत असलेल्या आणि बदलापूर घटनेच्या पार्श्वभुमीवर तसेच महिलांविषयीचे विविध गुन्हे तसेच जातीय, धार्मिक तणावाच्या घडामोडी अनुषंगाने घ्यावयाची दक्षता व करावयाच्या विविध उपाययोजना याबाबत सातारा जिल्हा पोलीस दलाचा सविस्तर आढावा घेतला. यामध्ये प्रामुख्याने मुली व महिला यांचे बाबतीत घडणार्‍या गुन्हयाबाबत तात्काळ प्रतिसाद देवून गुन्हा दाखल करावा, गुन्हयातील आरोपींना तात्काळ अटक करावी, अटक केलेल्या आरोपींचेवर कडक प्रतिबंधक कारवाई करावी, दामिणी/निर्भया पथकाने सतर्क राहून गस्तीदरम्यान महिलाविषयक गुन्हयांना प्रतिबंध करणे, शाळा कॉलेजमध्ये जावून मुले मुलींना मार्गदर्शन करणे, आक्षेपार्ह किंवा अनुचित घडणार्‍या घटनेवर तात्काळ कायदेशीर कारवाई करण्याच्या सूचना त्यांनी दिल्या आहेत.
आगामी काळात येणारे गणेशोत्सव, ईद व इतर धार्मिक सण व उत्सवांच्या बाबतीत कोणतेही दुर्लक्ष न करता योग्य ती दक्षता घेवून कोणताही अनुचित प्रकार घडणार नाही, याबाबत त्यांनी सुचना दिल्या. पुर्वी दाखल असलेल्या आरोपींवर योग्य ती प्रतिबंधक कारवाई करुन त्यांच्या हलचालींवर बारकाईने लक्ष ठेवण्याच्या सुचना दिल्या. येणार्‍या सणांच्या पार्श्वभुमीवर गावभेटी देणे, शांतता कमिटीच्या बैठका घेणे, गणेश मंडळाच्या बैठका घेणे, चांगले काम करणार्‍या गणेश मंडळांना प्रोत्साहनपर बक्षिस देणे, इतर शासकीय खात्यांसोबत समन्वय ठेवून त्यांच्याशी पत्रव्यवहार करुन पाठपुरावा करणे, उपद्रवी लोकांच्या हलचालींवर लक्ष ठेवणे, सोशल मिडीया मॉनिटरींग करुन अनुचित संदेश व पोस्ट करणारे लोकांवर कायदेशीर कारवाई करणे, दंगा काबू योजना राबविणे, संवेदनशील ठिकाणी रुट मार्च आयोजित करुन कोणत्याही प्रकारे जातीय, धार्मिक तणाव वाढणार नाही, याबाबतच्या दक्षता घेण्याच्या सूचना त्यांनी दिल्या आहेत.
यावेळी त्यांनी सातारा जिल्ह्यात घडत असलेल्या गुन्ह्यांच्या अनुषंगाने माहिती घेतली. फायर आर्म (अग्नीशस्त्र) बाबतीत विशेष पथक तयार करुन सक्रिय असणार्‍या टोळ्यांना व इसमांना शोधून ठोस कायदेशीर कारवाई करण्याबाबत सुचना दिल्या.
पोलीस ठाणे हद्दीत नविन अद्यावत करण्यात आलेली बिट मार्शल पेट्रालिंग व्यवस्था, रात्रगस्तीमध्ये केलेले बदल, सराफ कट्टा, बझार अशा गर्दीच्या ठिकाणी चालू केलेली पायी पेट्रोलिंग तसेच वरिष्ठांच्या आदेशाने वेळोवेळी राबविण्यात आलेली कोंबींग ऑपरेशन अशा विविध उपायांमुळे जुलै 2023 अखेरच्या तुलनेत जुलै 2024 अखेर गुन्ह्यांचे प्रमाण कमी करण्यास सातारा पोलीसांना यश मिळाले असल्याबाबत माहिती घेवून त्यांनी समाधान व्यक्त केले.
भविष्यात देखील घडणार्‍या गुन्ह्यास प्रतिबंध करण्याकरीता पोलीस ठाणे हद्दीत बीट मार्शल पेट्रोलिंग, पायी गस्त, प्रभावी रात्रगस्त, वेळोवेळी कोंबींग ऑपरेशन राबविणे, दृश्य पोलीसींग करणे, प्रत्येक गावात भेटी देवून लोकांमध्ये विश्वास निर्माण करणे, घडलेल्या गुन्ह्यांचा तात्काळ तपास करुन आरोपींचा शोध घेणे याबाबत सुचना देवून मार्गदर्शन केले.
पोलीस अभिलेखावरील आरोपी शेख सुरेश भोसले रा. खामगाव ता. फलटण जि. सातारा याच्याकडून दरोडा, जबरी चोरी, घरफोडीचे 26 गुन्हे उघड करुन 39 लाख 9 हजार रुपये किंमतीचे 54 तोळे वजनाचे सोन्याचे दागिणे हस्तगत करणार्‍या स्थानिक गुन्हे शाखेकडील पोलीस अधिकारी व अंमलदार यांना बक्षिस व प्रशंसा पत्र देवून त्यांनी गौरविले. तसेच या 26 गुन्ह्यातील फिर्यादी यांना सुनिल फुलारी यांच्याकडून मुद्देमाल (सोन्याचे दागिणे) परत करण्यात आले. त्याचप्रमाणे सातारा तालूका पोलीस ठाण्याकडील 302 या गुन्ह्यातील आरोपी जन्मठेप व 5 हजार रुपये दंड अशी शिक्षा झाल्याने या गुन्ह्यातील तपासी अधिकारी व अंमलदार यांना बक्षिस व प्रशंसापत्र देवून गौरविण्यात आले.
सुनिल फुलारी, विशेष पोलीस महानिरीक्षक, कोल्हापूर परिक्षेत्र कोल्हापूर यांनी आयोजित केलेल्या बैठकीस सातारा पोलीस अधीक्षक समीर शेख व सातारा जिल्हा पोलीस दलातील सर्व शाखांचे प्रभारी अधिकारी उपस्थित होते.