सातारा : चार भिंती परिसरात युवकाला लाकडी दांडक्याने मारहाण करून त्याच्याकडून एक लाख दहा हजाराचा मुद्देमाल पळवणार्‍या दोन सराईत गुन्हेगारांना सातारा शहर पोलीस ठाण्याच्या गुन्हे प्रकटीकरण शाखेने अटक केली आहे.

यश सुरेश शिंदे वय 22 रा. खंडोबाचा माळ, पंताचा गोट, रविवार पेठ, सातारा आणि अहमद खान वय 21, रा. शाहूनगर, जगतापवाडी, सातारा अशी आरोपींची नावे असून त्यांच्याकडून मुद्देमाल हस्तगत करण्यात आला आहे. न्यायालयाने या दोघांना दोन दिवसाची पोलीस कोठडी दिली आहे.

याबाबत पोलिसांनी दिलेली माहिती अशी, दि. 23 डिसेंबर रोजी फिर्यादी युवक एसटी स्टँड ते पोवई नाका येथे  जात असताना संबंधित दोघांनी त्याला दारू पिण्यासाठी पैसे मागितले. मात्र युवकाने नकार दिल्याने त्याला जबरदस्तीने दुचाकी गाडीवर बसवून त्याच्या पैशाने आरोपींनी दारू खरेदी केली व चार भिंती परिसरामध्ये नेऊन त्याला लाकडी दांडक्याने मारहाण केली. तसेच संबंधितांनी त्याच्याकडील मोबाईल व दुचाकी असा एक लाख दहा हजार किमतीचा मुद्देमाल लांबवला.

या गुन्ह्यासंदर्भात सातारा शहर पोलीस ठाण्याचे पोलीस निरीक्षक राजेंद्र मस्के यांनी गुन्हे प्रकटीकरण शाखेचे पोलीस निरीक्षक सचिन म्हेत्रे यांना तपासाच्या सूचना दिल्या. तक्रारदाराने दिलेल्या माहितीनुसार डीबी पथकाने रेकॉर्डवरील एका गुन्हेगाराला पहिल्यांदा ताब्यात घेतले. त्याच्याकडे कसून चौकशी केली असता त्याने अन्य एका साथीदाराच्या मदतीने हा गुन्हा केल्याचे कबूल केले. यानंतर दुसर्‍या संशयितालाही पकडण्यात आले. या दोघांनाही न्यायालयासमोर हजर केले असता त्यांना दोन दिवसाची पोलीस कोठडी देण्यात आली आहे. तसेच मोबाईल व मोटरसायकल त्यांच्याकडून हस्तगत करण्यात आली आहे.

या कारवाईमध्ये सातारा शहर पोलीस ठाण्याच्या गुन्हे प्रकटीकरण शाखेचे सहायक पोलीस निरीक्षक शाम काळे, पोलीस उपनिरीक्षक सुधीर मोरे, निलेश यादव, सुजित भोसले, सुनील मोहिते, निलेश जाधव, विक्रम माने, पंकज मोहिते, सचिन शिंदे, इरफान मुलाणी, संतोष घाडगे, सागर गायकवाड, विशाल धुमाळ, मच्छिंद्रनाथ माने, सुशांत कदम यांनी सहभाग घेतला.