सातारा : हिंदवी स्वराज्याचे साम्राज्यात रुपांतर करणारे चौथे छत्रपती, सातारा नगरीचे संस्थापक श्री. छ. शाहू महाराज (थोरले) यांच्या 275 व्या पुण्यातिथीनिमित्त संगममाहुली येथील समाधीस्थळी मावळा फौंडेशनच्या पुढाकाराने कृतज्ञता सोहळा आयोजित करण्यात आला होता. या सोहळ्याला उत्स्फूर्त प्रतिसाद मिळाला. मावळा फौंडेशनने आयोजित केलेल्या या सोहळ्यात विविध सामाजिक संस्था, जनता सहकारी बँक, आणि सातारकर सहभागी झाले होते. यावेळी पुण्यतिथीबरोबर श्री.छ. शाहू महाराजांचा जयंती सोहळा ही मोठ्या उत्साहात साजरा करण्याचा निर्णय मावळा फौंडेशनच्यावतीने घेण्यात आला.

संगममाहुली येथील समाधीस्थळी झालेल्या अभिवादनास प्रमुख अतिथी म्हणून पोलीस अधीक्षक समीर शेख, मावळा फौंडेशनचे अध्यक्ष विनोद कुलकर्णी, इतिहास अभ्यासक अजय जाधवराव, राजू शेठ पुरोहित, संग्राम बर्गे आणि मान्यवर उपस्थित होते.

प्रारंभी मान्यवरांच्यावतीने श्री.छ. शाहूमहाराज (थोरले) यांना अभिवादन करण्यात आले. यावेळी बोलताना पोलीस अधीक्षक समीर शेख यांनी छत्रपती शाहू महाराज हे अजातशत्रू होते. भारताच्या इतिहासातील धुरंधर राजकारणी, उत्कृष्ट योध्दा, प्रभावशाली मराठा शासनकर्ता,  मराठा साम्राज्याचा सर्वाधिक विस्तार करणारा राजा म्हणून भारतीय आणि विशेषत्वाने महाराष्ट्रीय इतिहासावर त्यांनी महत्त्वपूर्ण ठसा उमटवला. शाहू महाराजांच्या कारकिर्दीत शिवाजी महाराजांनी उभ्या केलेल्या आणि संभाजी महाराजांनी मोठ्या शौर्याने सांभाळलेल्या स्वराज्याचा सर्वात मोठा विस्तार झाला. सातारा हे त्याकाळात भारताच्या राजकारणाचे केंद्रस्थान आणि सत्तास्थान ठरले. त्यांचे कार्य फार मोठे असून मावळा फाऊंडेशनने हे कार्य पुढे चालवावे अशी अपेक्षा व्यक्त केली.

प्रास्ताविकात फाउंडेशनचे अध्यक्ष विनोद कुलकर्णी यांनी फाउंडेशनच्या आणि श्री.छ. शाहू महाराजांच्या कार्याचा आढावा घेत सातारा नगरीचे नाव शाहूनगरी असे करावे अशी मागणी केली. सातारा नगरपालिकेचे जे नवीन कार्यालय होत आहे, त्याच्या प्रवेशव्दाराजवळ शाहू महाराजांचा पुतळा बसवावा अशी आग्रही मागणी केली. यावेळी त्यांनी शाहू महाराजांची समाधीचा जीर्णोध्दार करणारे  राजू शेठ पुरोहित, अजय जाधवराव आणि त्यांच्या सर्व मित्र परिवारांचे विशेष आभार मानले. दरवर्षी शाहू महाराजांची पुण्यतिथी आणि जयंती मावळा फाउंडेशनच्या वतीने मोठ्या प्रमाणात साजरी करण्यात येईल असे सांगितले.