सातारा : शाहूपुरी पोलीस ठाण्याच्या गुन्हे प्रकटीकरण शाखेने वाहन चोरीच्या प्रकरणाचा अवघ्या काही दिवसांत छडा लावत एका सराईत वाहनचोराला अटक केली आहे. आरोपीकडून चोरीस गेलेली मोटारसायकल हस्तगत करण्यात आली असून सुमारे ६५ हजार रुपयांचा मुद्देमाल जप्त करण्यात आला आहे.

अटक करण्यात आलेल्या आरोपीचे नाव अप्रोज अल्ताफ बागवान (वय २९, रा. मंगळवार पेठ, सातारा) असे आहे. शहरात वाढत असलेल्या वाहन चोरीच्या घटनांच्या अनुषंगाने पोलीस निरीक्षक संग्राम शेवाळे यांनी गुन्हे प्रकटीकरण शाखेला विशेष तपास मोहीम राबविण्याच्या सूचना दिल्या होत्या.

तपासादरम्यान पोलिसांनी घटनास्थळाची पाहणी करून फिर्यादीकडून माहिती संकलित केली. परिसरातील सीसीटीव्ही फुटेजची तपासणी तसेच तांत्रिक विश्लेषण करण्यात आले. या तपासातून आरोपी मोळाचा ओढा परिसरात वावरत असल्याची माहिती मिळाल्यानंतर पोलिसांनी सापळा रचून त्याला ताब्यात घेतले.

चौकशीदरम्यान आरोपीने सुरुवातीला दिशाभूल करण्याचा प्रयत्न केला. मात्र पोलिसांनी केलेल्या कसून चौकशीत त्याने मोटारसायकल चोरीची कबुली दिली. त्यानंतर चोरीस गेलेली मोटारसायकल जप्त करण्यात आली.

ही कारवाई पोलीस उपनिरीक्षक शैलेंद्र गोवेकर यांच्या मार्गदर्शनाखाली पोलीस अंमलदार सुरेश घोडके, मनोज मदने, निलेश काटकर, ज्योतीराम पवार, महेश बनकर, अभय साबळे, सचिन पवार, स्वप्निल सावंत, सुमित मोरे, संग्राम फडतरे, विशाल धुमाळ आणि रोहित बाजारे यांनी यशस्वीपणे पार पाडली.

या उल्लेखनीय कामगिरीबद्दल पोलीस अधीक्षक निखिल पिंगळे, अतिरिक्त पोलीस अधीक्षक वैशाली कडूकर तसेच उपविभागीय पोलीस अधिकारी अविनाश शिळीमकर यांनी संबंधित पथकाचे कौतुक करून अभिनंदन केले आहे. वाहन चोरीच्या गुन्ह्यांचा छडा लावण्यात शाहूपुरी पोलिसांनी दाखविलेल्या तत्परतेमुळे नागरिकांमध्ये समाधान व्यक्त होत आहे.