सातारा : साताऱ्याचा ऐतिहासिक शाही दसरा गुरुवारी पारंपारिक पद्धतीने जल्लोषात पण साधेपणाने साजरा झाला. शाही मिरवणुकांना फाटा देऊन खासदार उदयनराजे भोसले यांनी साधेपणाने सीमोल्लंघनंकरत सातारकरांना विजयादशमीच्या शुभेच्छा दिल्या. यावेळी जलमंदिर येथील भवानी देवी मंदिरामध्ये ऐतिहासिक ठेवा असणाऱ्या, भवानी तलवारीचे पारंपारिक पद्धतीने पूजन करण्यात आले.

सातारा येथील पोवई नाका म्हणजेच शिवतीर्थ येथे सीमोल्लंघन झाल्यानंतर खा. उदयनराजे भोसले यांनी स्वतः सुरुची येथे जाऊन सार्वजनिक बांधकाम मंत्री शिवेंद्रसिंह राजे भोसले यांना विजयादशमीच्या शुभेच्छा दिल्या. मराठ्यांची चौथी राजधानी म्हणून ओळखल्या जाणाऱ्या, साताऱ्यात (गुरुवार, दि.2 रोजी) सायंकाळी साडेपाच वाजता विजयादशमीचा पारंपरिक सीमोल्लंघन सोहळा मोठ्या उत्साहात आणि मंगलमय वातावरणात पार पडला. सोहळ्याच्या प्रारंभी जलमंदिर येथे खा. छत्रपती उदयनराजे भोसले यांच्या हस्ते भवानी तलवारीचे पूजन करण्यात आले, यानंतर भवानी तलवारीस पोलिस विभागामार्फत शासकीय मानवंदना देण्यात आली. यानंतर संध्याकाळी सहा वाजता जलमंदिर येथून शाही मिरवणुकीला प्रारंभ झाला. शिंग, तुतारी, हलगी वादन झाल्यानंतर सजवलेल्या पालखीतून भवानी तलवारीची मिरवणूक काढण्यात आली. खासदार उदयनराजे भोसले आपल्या निवडक कार्यकर्त्यांसह पायी शिवतीर्थ येथे पोहोचले. शिवतीर्थ येथे छत्रपती शिवरायांच्या पुतळ्याचा सर्व परिसर विद्युत रोषणाईने सुशोभित करण्यात आला होता. येथे छत्रपती शिवरायांच्या पुतळ्याला अभिवादन करून, पुन्हा खा. उदयनराजे यांनी भवानी तलवारीची पूजा केली आणि सातारकरांना विजयादशमीच्या शुभेच्छा दिल्या. यंदाचा सोहळा पारंपारिक जल्लोषात पार पडला. मात्र त्याला साधेपणाची किनार होती. पूरग्रस्तांना मदत करण्यासाठी खा. उदयनराजे यांनी अतिरिक्त खर्च टाळण्याचे आवाहन केले होते. या दसऱ्या महोत्सवाच्या मिरवणुकीत सातारकर सहभागी झाले होते. सातारा जिल्ह्यामध्ये ठिकठिकाणी आदिशक्तीला वाजत गाजत उत्साहाने निरोप देण्यात आला. तसेच सीमोल्लंघनाचे पारंपारिक सोहळे मोठ्या उत्साहात पार पडले. दसऱ्यानंतर कोजागिरी पौर्णिमेपर्यंत देवांची विश्रांती म्हणून आता ही देवालय आता बंद राहणार आहेत. पावसाने सातारा जिल्ह्यात उघडीप घेतल्याने दसरा महोत्सवात सातारकरांचा उत्साह पाहायला मिळाला दुपारी चार नंतर सातारा शहर आणि जिल्ह्यामध्ये ठिकठिकाणी आदिशक्तीच्या वाजत गाजत मिरवणुका निघाल्या. सातारा जिल्हा पोलिसांनी जिल्हाभर सुमारे साडेपाचशे पोलिसांचा बंदोबस्त तैनात केला होता. साताऱ्यातच देवींची विसर्जन मिरवणूक सुमारे 11 तास रंगली. कोठेही अनुचित प्रकार घडला नाही. शहरातील ठिकाणी देवींच्या विसर्जनासाठी तळ्यांची सोय करण्यात आली होती. कायदा व सुव्यवस्थेच्या दृष्टीने सातारा शहरातील 98 उपद्रवी प्रवृत्तींना हद्दपार करण्यात आले होते.

..आणि बंधू शिवेंद्रराजे यांना सुरुची येथे जावून दिल्या शुभेच्छा !

खा. उदयनराजे भोसले यांनी सायंकाळी सात नंतर जलमंदिर येथे सातारकरांच्या शुभेच्छा स्वीकारल्या , तसेच त्यांना सोने देत दसऱ्याच्या शुभेच्छा दिल्या. त्यांनी स्वतः सुरुची बंगला येथे निवासस्थानी जाऊन सार्वजनिक बांधकाम मंत्री शिवेंद्रसिंहराजे भोसले यांना सुद्धा दसऱ्याच्या शुभेच्छा दिल्या. यावेळी माजी सभापती सुनील काटकर व रक्षक प्रतिष्ठानचे अध्यक्ष सुशील मोझर उपस्थित होते. विजयादशमीच्या निमित्ताने साताऱ्यातील दोन्ही राजे पुन्हा एकत्र आल्याने कार्यकर्त्यांमध्ये उत्साहाचे वातावरण दिसून आले.