सातारा : सातारा जिल्हा काँग्रेस कमिटीच्या वतीने शिक्षणमहर्षी डॉ. डी. वाय. पाटील यांच्या स्मरणार्थ कोल्हापूर येथील सनराईज मल्टिस्पेशालिटी हॉस्पिटलच्या सहकार्याने रविवारी (दि. ६ सप्टेंबर) मोफत आरोग्य तपासणी, उपचार व शस्त्रक्रिया मार्गदर्शन शिबिराचे आयोजन करण्यात आले आहे. हे शिबिर सकाळी ११ ते दुपारी २ या वेळेत सेव्हन स्टार सिनेमागृहाशेजारी, बसस्थानकाजवळील सातारा जिल्हा काँग्रेस कमिटी कार्यालयात होणार आहे.
शिबिरात हृदयविकार, अँजिओग्राफी, पित्ताशय व किडनीतील खडे, प्रोस्टेट, कॅन्सर, गुडघे, खुबा, लिगामेंट, व्हेरिकोज व्हेन्स, थायरॉईड व गर्भाशयातील गाठी तसेच मणक्याच्या आजारांची तपासणी व उपचार मार्गदर्शन करण्यात येणार आहे. ईसीजी, रक्तातील साखर, रक्तदाब, युरोफ्लोमेट्री व PSA तपासणी मोफत केली जाणार आहे.
महात्मा ज्योतिबा फुले जनआरोग्य योजनेअंतर्गत पात्र रेशनकार्डधारकांना विविध शस्त्रक्रिया व उपचार मोफत मिळवून देण्यासाठी मार्गदर्शन केले जाणार आहे. पुढील उपचारासाठी आवश्यक रुग्णांना मोफत बस सुविधा, रुग्णालयात दाखल झालेल्या रुग्णांना जेवण व एका नातेवाईकाच्या निवासाची सुविधा उपलब्ध असल्याचे आयोजकांनी सांगितले.
पूर्वनोंदणी आवश्यक असून ८०८०७९५०६०, ८९२८७३६९९९ या क्रमांकावर संपर्क साधावा. आधारकार्ड, रेशनकार्ड व जुने वैद्यकीय अहवाल सोबत आणावेत, असे आवाहन आयोजक सादिकअली बागवान यांनी केले आहे.