कराड  : जिल्हा मध्यवर्ती सहकारी बँकेच्या आगामी निवडणुकीच्या पार्श्वभूमीवर जिल्ह्यातील राजकीय वातावरण तापू लागले आहे. भाजपने निवडणुकीत स्वबळाचा नारा दिला आहे. मात्र, सत्ताधारी आघाडीतील घटक पक्ष असलेल्या शिवसेनेने अद्याप भूमिका स्पष्ट केलेली नाही. शिवसेना ‘वेट ॲण्ड वॉच’च्या भूमिकेत आहे, असे संकेत पालकमंत्री शंभूराज देसाई यांनी आज येथे माध्यमांशी बोलताना दिले.

जिल्हा बँकेबाबत मंत्री देसाई म्हणाले, ‘सध्या निवडणुकीसाठीच्या ठराव संकलनाची प्रक्रिया सुरू आहे. त्यानंतर कच्च्या, पक्क्या मतदार याद्या प्रसिद्ध होतील. ती सगळी प्रक्रिया पूर्ण झाल्यानंतर शिवसेना अधिकृत भूमिका जाहीर करेल.’

शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी शिवसेनेचे ‘धनुष्यबाण’ चिन्ह गोठवण्याच्या केलेल्या मागणीवर बोलताना मंत्री देसाई यांनी जोरदार समाचार घेतला.

ते म्हणाले, ‘शिवसेनेचे धनुष्यबाण चिन्ह गोठवण्याची मागणी करणे म्हणजे, बाळासाहेब ठाकरे यांचे विचार गोठवण्यासारखे आहे. संजय राऊत यांच्या वक्तव्याचा शिवसैनिक तीव्र निषेध करत आहे. जिथे संजय राऊत दिसतील तिथे शिवसैनिक त्यांना त्या विधानाचा जाब विचारल्याशिवाय राहणार नाहीत.’