सातारा : शाळेच्या पॅसेजमध्ये लिफ्टच्या बांधकामासाठी उभारलेले ग्रील सुरक्षितपणे न बसवल्याने ते विद्यार्थिनीच्या अंगावर पडून ती जखमी झाल्याप्रकरणी कंत्राटदाराविरुद्ध सातारा शहर पोलीस ठाण्यात गुन्हा दाखल करण्यात आला आहे.

आप्पासाहेब भाऊराव पाटील इंग्लिश मीडियम स्कूलमध्ये २३ जुलै रोजी सकाळी सव्वा आठच्या सुमारास ही घटना घडली. बांधकामासाठी पॅसेजमध्ये उभे केलेले ग्रील विद्यार्थिनी आराध्या हिच्या अंगावर पडल्याने तिच्या डाव्या खांद्याला दुखापत झाली. याबाबत आयकर सल्लागार निवेदिता नागेश साळुंखे (वय ३९, रा. शाहूनगर, सातारा) यांनी ७ सप्टेंबर रोजी पोलिसांत फिर्याद दिली. त्यानुसार विजय नामदेव जाधव (रा. यशोदानगर, गोडोली) याच्याविरुद्ध गुन्हा दाखल करण्यात आला आहे. घटनेचा पुढील तपास महिला पोलीस हवालदार सूर्यवंशी करीत आहेत.