सातारा : जिल्ह्यातील दुष्काळी पट्ट्यातील माण, खटाव आणि फलटण या तीन तालुक्यांमध्ये पाणीटंचाईची तीव्रता वाढली असून, ५९ गावे व ३२२ वाड्यांमधील तब्बल ७९ हजार ६४५ नागरिक आणि ६४ हजार ९४७ पशुधनाची तहान भागवण्यासाठी प्रशासनाकडून ५२ टँकरद्वारे पाणीपुरवठा सुरू करण्यात आला आहे.
​जिल्हा प्रशासनाने दिलेल्या माहितीनुसार, सध्या जिल्ह्यात सुरू असलेल्या एकूण ५२ टँकरमध्ये १ शासकीय आणि ५१ खासगी टँकरचा समावेश आहे. या सर्व टँकरसाठी दररोज १०९.७२ खेपा मंजूर करण्यात आल्या आहेत. पाण्याची ही गरज पूर्ण करण्यासाठी प्रशासनाने जिल्ह्यातील ११ विहिरी आणि १० बोअरवेलचे अधिग्रहण केले असून, त्या माध्यमातून टँकर भरून संबंधित गावांमध्ये पाणी पोहोचवले जात आहे. टंचाईग्रस्त तालुक्यांमध्ये माण तालुक्याची स्थिती सर्वाधिक गंभीर असून, येथील ४५ गावे आणि २६९ वाड्यांमधील ६४ हजार ४५४ लोकसंख्या व ५८ हजार पशुधनाला टँकरद्वारे पाणीपुरवठा केला जात आहे. खटाव तालुक्यातील ११ गावे आणि ५१ वाड्यांमधील १३ हजार ४१७ नागरिक व ६ हजार ६६७ पशुधनासाठी ७ खासगी टँकर कार्यरत आहेत. तसेच फलटण तालुक्यातील ३ गावे आणि २ वाड्यांमधील १ हजार ७७४ लोकसंख्या व २८० पशुधनाची तहान भागवण्यासाठी १ खासगी टँकर सुरू ठेवण्यात आला आहे.