सातारा : शिवजयंती महोत्सव समिती सातारा यांच्या वतीने दिनांक 17 ते 19 अखेर शाहू कलामंदिर येथे पहिल्या शिवसेनेचे संमेलनाचे आयोजन करण्यात आले आहे. दिनांक 17 रोजी सकाळी साडेदहा वाजता शिव साहित्य संमेलनाचे उद्घाटन सार्वजनिक बांधकाम मंत्री शिवेंद्रसिंहराजे भोसले यांच्या हस्ते होणार आहे. यावेळी अभिनेत्री मृणाल कुलकर्णी, जिल्हाधिकारी संतोष पाटील, आयसीसीआर नवी दिल्लीचे अध्यक्ष डॉक्टर विनय सहस्त्रबुद्धे, पालिका मुख्याधिकारी अभिजीत बापट, उपशिक्षणाधिकारी रवींद्र खंदारे यांची प्रमुख उपस्थिती राहणार आहे.

दिनांक 17 रोजी सकाळी छत्रपती शिवराय व स्वराज्याचे शिलेदार सौरभ करणे, थोरली मसलत शैलेश वरखडे, दुपारी शिवशाहीर यांचे पोवाडे पियुशा भोसले व सहकारी सादर करणार आहेत. यावेळी जिल्हा परिषदेच्या मुख्य कार्यकारी अधिकारी याशिनी नागराजन यांना निमंत्रित करण्यात आले आहे. यानंतर छत्रपती युद्धनीती या विषयावर मोहन शेटे छत्रपतींचे दुर्गनीती या विषयावर प्राध्यापक प्र. के. घाणेकर यांचे मार्गदर्शन सत्र होणार आहे. सायंकाळी सात वाजता सांगता कार्यक्रम होणार आहे. अफजलखान वध प्रसंग सारंग मांडके, सारंग भोईरकर सादर करणार आहेत. यावेळी पोलीस अधीक्षक समीर शेख यांना निमंत्रित करण्यात आले आहे.

दिनांक 18 रोजी सायंकाळी गड पूजन व किल्ले अजिंक्यतारा येथे मशाल महोत्सव आयोजित करण्यात आला आहे.

दिनांक 19 रोजी शिवजयंती च्या मुख्य दिवशी सायंकाळी पाच वाजता भव्य शोभायात्रा काढण्यात येणार आहे. केरळचे 100 कलाकार केरळी वाद्यांसह शोभा यात्रेत सहभागी होत आहेत. शोभायात्रेत गजीनृत्य, ढोलताशा पथक, तुतारी, हलगी वादन तसेच अनेक कलाकार आपली कला सादर करणार आहेत. उंट, घोडे शोभायात्रा मिरवणुकीचे आकर्षण राहणार आहे. रात्री नऊ वाजता शिवतीर्थ पोवई नाका येथे शिवेंद्रसिंहराजे भोसले यांच्या हस्ते छत्रपती शिवरायांची महाआरती होणार आहे. या कार्यक्रमाचा लाभ सातारकरांनी घ्यावा, असे आवाहन शिवराज्याभिषेक दिन उत्सव समिती राजधानी सातार्‍याच्या वतीने करण्यात आले आहे.