सातारा : महाराष्ट्र जिल्हा परिषद (जिल्हा सेवा) सेवाप्रवेशोत्तर परीक्षेच्या पार्श्वभूमीवर सातारा जिल्हा परिषदेच्या वतीने परीक्षार्थी कर्मचाऱ्यांसाठी दोन दिवसीय प्रशिक्षण कार्यक्रमास शुक्रवारी प्रारंभ झाला. जिल्हा परिषदेच्या छत्रपती शिवाजी महाराज सभागृहात आयोजित या प्रशिक्षणात एकूण ११४ कर्मचारी सहभागी झाले आहेत. सेवाप्रवेशोत्तर परीक्षा ४ व ५ जुलै रोजी अण्णासाहेब कल्याणी विद्यालय, सातारा येथे होणार आहे.

प्रशिक्षणात कार्यालयीन कामकाज, सेवा नियम, जिल्हा परिषद व पंचायत समिती अधिनियम, शिस्त व अपील नियम, रजा, वेतन, निवृत्ती वेतन, लेखा नियम आदी विषयांवर तज्ज्ञ अधिकाऱ्यांकडून मार्गदर्शन करण्यात येत आहे. या प्रशिक्षणामुळे परीक्षार्थी कर्मचाऱ्यांना अभ्यासक्रमाची प्रभावी तयारी होऊन परीक्षेत यश मिळण्यास मदत होईल, असा विश्वास जिल्हा परिषद प्रशासनाने व्यक्त केला.