नवी दिल्ली : नवी दिल्लीतील ऐतिहासिक आणि प्रसिद्ध आंदोलनाचे केंद्र मानल्या जाणाऱ्या जंतर-मंतरची 'अधिकृत आंदोलन स्थळ' म्हणून असणारी मान्यता दिल्ली पोलिसांकडून रद्द (De-notify) करण्यात आली आहे. दिल्ली पोलिसांनी यासंदर्भात एक महत्त्वाचे परिपत्रक (Circular) जारी केले असून, जंतर-मंतरवर आता कोणत्याही प्रकारच्या आंदोलनांना किंवा निदर्शनांना परवानगी दिली जाणार नाही.                                    या निर्णयामुळे राजधानी दिल्लीतील आंदोलनांच्या संस्कृतीत एक मोठा आणि महत्त्वपूर्ण बदल घडून येणार आहे. दिल्ली पोलिसांनी दिलेल्या माहितीनुसार, जंतर-मंतरची मान्यता रद्द केल्यानंतर आता निदर्शने आणि आंदोलनांसाठी नव्या पर्यायी जागांचे वाटप करण्यात येणार आहे. यामुळे आंदोलकांना आपले मागण्या मांडण्यासाठी नवीन आणि निश्चित केलेल्या ठिकाणीच एकत्र यावे लागेल. सुरक्षा यंत्रणांवर पडणारा ताण कमी करणे आणि ल्युटियन्स दिल्ली परिसरातील वाहतूक व्यवस्था सुरळीत ठेवणे हा या नव्या धोरणाचा मुख्य उद्देश आहे.
जंतर-मंतरची अधिकृत आंदोलनाची जागा रद्द झाल्यानंतर, दिल्ली पोलिसांच्या आदेशानुसार (L&O/48/2026) सार्वजनिक सभा आणि आंदोलनांसाठी तीन नवीन पर्यायी ठिकाणे निश्चित करण्यात आली आहेत. यामध्ये मध्य दिल्लीतील 'रामलीला मैदान' ५०,००0 लोकांच्या मध्यम आकाराच्या जमावासाठी मंजूर करण्यात आले आहे. तसेच, मोठ्या रॅली आणि जनसमुदायासाठी उत्तर दिल्लीतील 'बुराडी मैदान' आणि पूर्व दिल्लीतील 'सीबीजी ग्राउंड' (CBD Ground) या नव्या जागांची घोषणा करण्यात आली आहे. या नवीन व्यवस्थेमुळे राजधानीतील वाहतूक सुरळीत राहण्यास आणि आंदोलनांचे योग्य व्यवस्थापन होण्यास मदत होणार आहे.