सातारा : सातारा जिल्ह्यामध्ये खाजगी फायनान्स कंपनीचा कारभार बेफाम झाला असून यावर कोणताही शासकीय प्रतिबंध नाही. हा मनमानी कारभार तातडीने थांबवावा अन्यथा शिवसेना स्टाईलने त्यांना धडा शिकवला जाईल, असा इशारा उद्धव बाळासाहेब ठाकरे शिवसेना गटाचे जिल्हाप्रमुख सचिन मोहिते यांनी दिला आहे. याचे निवेदन त्यांनी शुक्रवारी निवासी उपजिल्हाधिकारी नागेश पाटील यांना सादर केले.

या निवेदनात नमूद आहे की खाजगी सावकारी पेक्षाही अत्यंत वाईट पद्धतीने खाजगी फायनान्स कंपन्यांची वसुली सुरू आहे. गुंड प्रवृत्तीच्या व्यक्तींना वसुलीसाठी पाठवणे, मोठया आवाजात भाषेत वयोवृद्ध महिला व्यक्ती धमकावणे, मोठ्याने गोंधळ करत कर्जदार व्यक्तीची बदनामी करणे, खातेदाराचा चेक वारंवार बाउन्स करून त्याला प्रमाणापेक्षा जास्त दंड लावणे, मोठ्या चार चाकी गाड्या पाठलाग करून ताब्यात घेणे, यासारखे विचित्र प्रकार सध्या जिल्ह्यात सुरू आहे. सातारा तालुक्यात खाजगी कंपनीच्या वसुलीच्या तगाद्याला कंटाळून एका मागासवर्गीय समाजातील महिलेने आत्महत्या केल्याची घटना समोर आली आहे. या खाजगी कंपन्यांच्या मनमानी कारभारावर कोणाचाही वचक नाही याबाबत प्रशासनाने ठोस पावले उचलावीत अन्यथा या फायनान्स कंपन्यांना शिवसेना स्टाईलने धडा शिकवला जाईल असे निवेदनात नमूद आहे.

यावेळी जिल्हाप्रमुख सचिन मोहिते यांच्यासह सागर रायते, रुपेश वंजारी, शिवराज टोणपे, रविंद्र भंडगे, हरि पवार, इम्रान बागवान, किशोर घोरपडे, राहुल मोहिते, संतोष किर्दत इत्यादी उपस्थित होते.