सातारा : जिल्हा नियोजन समितीच्या पहिल्याच बैठकीत सातारा जिल्ह्यासाठी तब्बल 712 कोटी रुपयांच्या विकासा आराखड्याला अवघ्या पंधरा मिनिटांमध्ये मंजुरी देण्यात आली. या आराखड्यामध्ये विविध विषयांचा आढावा घेण्यात येऊन विकास कामांसाठी उपमुख्यमंत्री तथा वित्त मंत्री अजित दादा पवार यांच्याकडे बैठकीत पाठपुरावा करणार असल्याचे शंभूराज देसाई यांनी बैठकीनंतर सांगितले. त्यानंतर ते तात्काळ मुंबईसाठी रवाना झाले.

या बैठकीला राज्याचे सार्वजनिक बांधकाम मंत्री शिवेंद्रसिंहराजे भोसले, ग्रामविकास मंत्री जयकुमार गोरे, जिल्हाधिकारी संतोष पाटील, सातारा जिल्हा परिषदेच्या मुख्य कार्यकारी अधिकारी याशिनी नागराजन तसेच प्रशासनाचे सर्व अधिकारी उपस्थित होते. सातारा जिल्ह्यातील प्राधान्य क्रमाने राहिलेल्या प्रकल्पांचा आढावा घेऊन त्याकरिता लागणाऱ्या निधीचा सविस्तर आढावा शंभूराज देसाई यांनी घेतला. याबाबतचे सादरीकरण जिल्हा नियोजन अधिकारी शशिकांत माळी यांनी केले.

बैठकीमध्ये 712 कोटी रुपयांच्या विकास आराखड्याला अवघ्या पंधरा मिनिटात मंजुरी मिळाली. सातारा जिल्ह्यातील जिल्हा कार्यक्षेत्र अंतर्गत येणारी मार्ग साकव पूल पर्यटन स्थळांचा विकास कृषी पंपांना वीज जोडणी तसेच आपत्कालीन निधी डोंगरी भागासाठी प्रलंबित कामांसाठी लागणारा निधी या सर्वच कामांचा शंभुराज देसाई यांनी पालकमंत्री म्हणून बारकाईने आढावा घेतला. या कामासंदर्भात स्वतंत्र आराखडे तयार करून अधिकाऱ्यांनी तात्काळ प्रस्ताव करावेत. तसेच जास्तीत जास्त निधी आणण्यासंदर्भात तपशीलवार सादरीकरण व्हावे, अशा सूचना त्यांनी प्रशासनाला केल्या. बैठकीनंतर या सर्व प्रक्रियेची त्यांनी माहिती दिली. सातारा जिल्ह्याच्या विकासासाठी आम्ही सर्व चारही मंत्री निश्चित पाठपुरावा करू. वित्तमंत्री अजितदादा पवार यांच्याकडे मंगळवारी बैठक होणार असून या बैठकीमध्ये सातारा जिल्ह्यासाठी आम्ही निधी आणण्यासाठी प्रयत्नशील आहोत, असे ते म्हणाले.