सातारा : शहरातील कायम गजबजलेला आणि वाहतूक कोंडीसाठी ओळखला जाणारा समर्थ मंदिर परिसर आता नव्या रूपात दिसू लागला आहे. सातारा नगरपालिकेने सुरू केलेल्या रस्ता रुंदीकरण आणि अतिक्रमण निर्मूलन मोहिमेच्या दुसर्‍या दिवशीही जोरदार कारवाई करण्यात आली. पक्क्या बांधकामांवर बुलडोझर चालवल्यामुळे चौकाचा परिसर अधिक खुला झाला असून वाहनचालकांना मोठा दिलासा मिळण्याची चिन्हे आहेत.

समर्थ मंदिर चौक ते बोगदा हा शहरातील महत्त्वाचा मार्ग असल्याने येथे दिवसभर मोठी वाहतूक असते. मात्र गेल्या काही वर्षांत वाढलेल्या अतिक्रमणांमुळे रस्त्याची रुंदी कमी झाली होती. परिणामी वारंवार वाहतूक ठप्प होत होती. ही समस्या लक्षात घेऊन पालिकेने मोठ्या प्रमाणावर मोहीम सुरू केली आहे.

मंगळवारी झालेल्या कारवाईमध्ये अतिक्रमण विभागाचे निरीक्षक प्रशांत निकम यांच्या मार्गदर्शनाखाली पालिकेचे कर्मचारी, जेसीबी यंत्रणा आणि पोलीस बंदोबस्त तैनात करण्यात आला होता. कायदा व सुव्यवस्था अबाधित राहावी यासाठी परिसरात कडेकोट सुरक्षा ठेवण्यात आली होती. कारवाईदरम्यान समर्थ मंदिर चौकातील वाहतूक तात्पुरती बंद करून पर्यायी मार्गाने वाहनांची सोय करण्यात आली.

पहिल्या टप्प्यात काही पक्की बांधकामे हटवण्यात आल्यानंतर दुसर्‍या दिवशी आणखी अनेक बांधकामांवर कारवाई करण्यात आली. चौकातील मंदिर परिसरासह मागील बाजूस वाढवलेली अनधिकृत बांधकामे जमीनदोस्त करण्यात आली. त्यामुळे पूर्वी अरुंद वाटणारा चौक आता अधिक विस्तीर्ण आणि मोकळा दिसत आहे.

या मोहिमेला स्थानिक नागरिकांकडूनही चांगला प्रतिसाद मिळत असल्याचे चित्र आहे. काही रहिवाशांनी स्वखुशीने आपली अतिक्रमणे काढण्यास सुरुवात केली आहे. रस्त्याची नियोजित रुंदी कायम ठेवण्यासाठी दोन्ही बाजूंनी बांधकामे मागे घेण्याची प्रक्रिया सुरू असल्याचे प्रशासनाने सांगितले.

स्थानिक नागरिकांनी शहराच्या भविष्यासाठी ही कारवाई आवश्यक असल्याचे मत व्यक्त केले. वाहतूक सुरळीत होण्यासाठी आणि शहराचा विकास साधण्यासाठी रस्ते रुंद होणे आवश्यक आहे. त्यामुळे प्रशासनाच्या निर्णयाला आम्ही पाठिंबा देत आहोत, असे नागरिकांनी सांगितले.

पालिकेच्या या धडक मोहिमेमुळे समर्थ मंदिर परिसरातील दीर्घकालीन वाहतूक समस्येवर काही प्रमाणात उपाय होण्याची अपेक्षा व्यक्त केली जात आहे. तसेच शहरातील इतर अतिक्रमित भागांमध्येही अशीच मोहीम राबवली जाण्याची शक्यता वर्तवली जात आहे.