कराड : मनाविरुद्ध इतर पुरुषांशी शारीरिक संबंध ठेवण्यास भाग पाडत देहव्यापार करण्यास प्रवृत्त केल्याप्रकरणी तालुक्यातील एका अनाथ आश्रम चालक महिलेसह दोघांविरोधात कराड तालुका पोलिस ठाण्यात गुन्हा नोंद करण्यात आला आहे. दोन्ही संशयितांना अटक करण्यात आली आहे. त्यांना प्रथमवर्ग न्यायदंडाधिकार्‍यांसमोर हजर केले असता 23 ऑगस्टपर्यंत पोलीस कोठडीत ठेवण्याचे आदेश देण्यात आल्याचे पोलीस निरीक्षक महेंद्र जगताप यांनी सांगितले.
पोलीस उपअधीक्षक अमोल ठाकूर व पोलीस निरीक्षक महेंद्र जगताप यांना एका महिलेस जबरदस्तीने इतरांशी शारीरिक संबंध ठेवण्यास भाग पाडल्याबाबतची माहिती मिळाली होती. तसेच लोणंद परिसरातील संबंधित महिला सातारा येथे आल्याचे समजल्यानंतर कराड तालुका पोलीस ठाण्याचे एक पथक सातार्‍याला रवाना झाले होते. संबंधित महिलेस तालुका पोलिसांनी कराडला आणल्यानंतर तिच्या सांगण्यावरुन तक्रार दाखल केली आहे. संबंधित महिला व संशयित महिला यांची एक वर्षापूर्वी ओळख झाली होती. त्यानंतर संशयित महिलेने इतर पुरुषांशी शारीरिक संबंध ठेवण्यास भाग पाडत देहव्यापार करण्यास प्रवृत्त केले. तसेच तिने आर्थिक प्राप्ती केल्याचे तक्रारीत नमूद केले आहे. याकामी संशयित महिलेस वाल्मिक महादेव माने हा मदत करत जबरदस्तीने शारीरिक संबंध ठेवत होते, असे पीडित महिलेने दिलेल्या तक्रारीत नमूद आहे. याप्रकरणी पोेलिसांनी दोन्ही संशयितांना अटक केली आहे. तसेच याप्रकरणी आणखी काही संशयितांचा सहभाग आहे का, याबाबतचा तपास सुरु असल्याची माहिती पोलीस निरीक्षक महेंद्र जगताप यांनी दिली आहे.

तिथे कोणी राहत नसल्याची माहिती
कराड तालुक्यातील टेंभू परिसरातील अनाथ आश्रमाच्या नावावर महिलांना ठेवून देहविक्री करण्यास भाग पाडत लोकांकडून पैसे स्विकारले जात असल्याची माहिती पोलिसांना मिळाली होती. पोलीस उपअधिक्षक अमोल ठाकूर, पोलीस निरिक्षक महेंद्र जगताप यांनी घटनास्थळी जाऊन पाहणी केल्यानंतर एक वृद्ध महिला तिच्या नातीसह दहा वर्षांपासून रहात असल्याचे समोर आले. तसेच त्याठिकाणी इतर कोणीही महिला वा मुली राहत नसल्याचे पोलिसांनी सांगितले आहे. पोलिसांनी वृद्ध महिलेसह तिच्या नातीस आशाकिरण संस्थेत पाठविले आहे.