आलोक कुमारजी यांची अयोध्या येथे विश्व हिंदू परिषदेच्या केंद्रीय संघटन बैठकीत निवड झाल्यानंतर त्यांनी संत सेवा यात्रेचा प्रारंभ केला. नाशिक, पुणे, कोल्हापूर येथील दौर्‍यानंतर सांगली वरून ते थेट सातार्‍यात दाखल झाले. यावेळी विश्व हिंदू परिषदेचे प्रांत मंत्री संजय मुद्राळे, डॉक्टर रवी कोठाळे, विश्व हिंदू परिषद सातारा जिल्हा मंत्री विजय गाढवे, कराड मंत्री संतोष देशपांडे आदी उपस्थित होते.

यावेळी घेण्यात आलेल्या पत्रकार परिषदेत आलोक कुमारजी म्हणाले, विश्व हिंदू परिषदेच्या वतीने संत सेवा यात्रा या माध्यमातून संपूर्ण भारतामध्ये हिंदू समाजाचे संघटन आणि सशक्तिकरण या प्रक्रिया महत्त्वपूर्ण पद्धतीने राबवल्या जात आहेत. विश्व हिंदू परिषदेच्या माध्यमातून आयोध्येमधील प्रभू श्रीराम यांच्या जन्मभूमीवर भव्य मंदिर बांधण्याच्या हेतूने जगातील सर्वात मोठे 44 दिवसाचे जनसंपर्क अभियान हाती घेतले गेले. श्रीराम जन्मभूमी तीर्थक्षेत्र न्यास याची मान्यता मिळाल्यावर हे निधी संकलन अभियान संपूर्ण भारतात 15 जानेवारी 2021 ते 27 फेब्रुवारी 2021 या कालावधीत झाले. त्यातून एक हिंदू धर्मियांची आस्था असणारे मोठे मंदिर उभे राहिले. या माध्यमातून या मंदिर परिसरामध्ये हिंदू धर्मियांच्या आस्थेचा विषय असणारा राम दरबार ही भरवला जाणार आहे.

विश्व हिंदू परिषदेच्या आगामी वाटचालीविषयी ते म्हणाले, महाराष्ट्रातील संत साहित्य आणि सेवापरंपरेला वेगळा इतिहास आहे. महाराष्ट्रातील संत आणि मठाधिपती यांच्या गाठीभेटी घेऊन हिंदू धर्मियांची अस्मिता जोपासणे हिंदू संघटन वाढवणे आणि त्याचा प्रसार व प्रचार करणे इत्यादी उपक्रम हाती घेण्यात आले असून त्या माध्यमातून या यात्रेची वाटचाल सुरू आहे. या यात्रेचा समारोप पुणे येथे एका मोठ्या कार्यक्रमामध्ये होणार आहे.