सातारा : जिल्हा परिषद प्राथमिक व माध्यमिक शाळेतील सुमारे ६५ विद्यार्थ्यांना सैनिक स्कूल सातारा येथे दर महिन्याच्या दुसऱ्या व चौथ्या रविवारी लष्करी प्रशिक्षणाचे धडे मिळणार आहे. प्राथमिक शिक्षण विभागाचा नाविन्यपूर्ण उपक्रमामुळे विद्यार्थ्यांना देशसेवेची माहिती मिळणार आहे.

सातारा जिल्ह्यातील जिल्हा परिषद अंतर्गत येणाऱ्या शासकीय शाळांमधील सातवी ते दहावीपर्यंतच्या विद्यार्थ्यांना दुसरा व चौथ्या रविवारी सैनिक स्कूल सदरबझार सातारा येथे लष्करी प्रशिक्षण आणि नेतृत्वाचा अनुभव देण्यात येणार आहे. या ठिकाणी डिजिटल मोबाईल तारांगण शो आयोजित करून राष्ट्रीय अंतराळ सप्ताह साजरा केला जाणार आहे.

या प्रशिक्षणासाठी छत्रपती प्रतापसिंह हायस्कूल साताराचे १५ विद्यार्थी, जि. प. प्राथमिक शाळा कोडोलीचे १५ विद्यार्थी, जि. प. शाळा अपशिंगे मिलिटरीचे १० विद्यार्थी, जि. प. शाळा नागठाणे ५ विद्यार्थी, जि. प. शाळा मेढा १० विद्यार्थी, जि. प. शाळा ओझर्डे ५ विद्यार्थी, जि. प. शाळा सोनके ५ विद्यार्थ्यांची निवड करण्यात आली असल्याची माहिती प्राथमिक शिक्षणाधिकारी अनिस नायकवडी यांनी दिली.

जिल्हा परिषदेच्या शाळांमधील विद्यार्थ्यांच्या सर्वांगीण विकासाला चालना देण्यासाठी आता त्यांना सैनिक स्कूल सातारा येथे लष्करी प्रशिक्षणाची संधी उपलब्ध करुन देण्याचा अनोखा उपक्रम प्राथमिक शिक्षण विभागाने हाती घेतला आहे. या माध्यमातून विद्यार्थ्यांमध्ये शिस्त, नेतृत्वगुण, आत्मविश्वास, शारीरिक तंदुरूस्ती आणि देशभक्तीची भावना रुजविण्यावर भर दिला जाणार आहे. ग्रामीण भागातील विद्यार्थ्यांना लष्करी प्रशिक्षणाची शिस्तबद्ध पद्धत प्रत्यक्ष अनुभवता यावी हा या उपक्रमामागील उद्देश आहे.