नवी दिल्ली : केंद्र सरकारने दसरा आणि दिवाळीपूर्वी गरीबांना मोठं गिफ्ट दिलं आहे. केंद्र सरकारच्या पंतप्रधान गरिब कल्याण योजनेअंतर्गत आणखी 3 वर्षे मोफत धान्य देण्याचा निर्णय घेण्यात आला आहे. पंतप्रधान मोदींच्या मंत्रिमंडळाने गरीबांना मोफत वाटप करण्यात येणाऱ्या तांदळाचा पुरवठा डिसेंबर 2028 पर्यंत सुरू ठेवण्याचा निर्णय घेतला. हा तांदूळ प्रधानमंत्री गरीब कल्याण अन्न योजना (PMGKAY) आणि इतर कल्याणकारी योजनांतर्गत गरीबांना मोफत वाटला जातो.

जुलै 2024 ते डिसेंबर 2028 पर्यंत फोर्टिफाइड तांदळाचा मोफत पुरवठा सुरू ठेवण्याच्या प्रस्तावाला मंत्रिमंडळाने मंजुरी दिली आहे. याशिवाय मंत्रिमंडळाने अनेक महत्त्वाच्या योजनांनाही मंजुरी दिली आहे ज्यामध्ये सीमावर्ती भागातील पायाभूत सुविधांच्या विकासाशी संबंधित नियोजनाचाही समावेश आहे. केंद्रीय मंत्री अश्विनी वैष्णव यांनी केंद्रीय मंत्रिमंडळ बैठकीत घेतलेल्या सर्व महत्त्वपूर्ण निर्णयांची माहिती प्रसारमाध्यमांना दिली.

फोर्टिफाइड तांदळाच्या मोफत पुरवठा अश्विनी वैष्णव म्हणाले की, गरीबांमध्ये अशक्तपणा आणि सूक्ष्म अन्नद्रव्यांच्या कमतरतेवर मात करण्यासाठी फोर्टिफाइड तांदळाच्या मोफत पुरवठा योजनेला जुलै 2024 ते डिसेंबर 2028 पर्यंत मुदतवाढ देण्यास सरकारने मान्यता दिली आहे. याद्वारे मध्यान्ह भोजन, मोफत रेशन योजना, पंतप्रधान पोषण योजना, ISDS आणि आकांक्षा यांसारख्या कल्याणकारी योजनांव्यतिरिक्त पंतप्रधान गरीब कल्याण अन्न योजना इत्यादी अंतर्गत मोफत तांदूळ वितरित केले जातात.